By-election chuh tura hming pelut mi 4 an awm tawh

Dampa Bial-a Assembly by-election neih tur chuh turin Inrinni thleng khan mi pali ten an hming an pelut tawh a, naktuk thleng hian hming pekluh theih a ni ang.

Thla thar November 11-a Dampa Bial-a Assembly by-election neih tur chuh tumte tana hming pekluhna hun hawn mekah hian Inrinni khan Indian National Congress (INC) Official Candidate John Rotluangliana leh Mizo National Front (MNF) Official Candidate Dr. R. Lalthangliana te chuan he Inthlanna a Returning Officer Malsawmzuala hnenah an hming an pelut a. Nomination paper an thehluh hnua thuthar thehdarhtute an kawmna ah INC Candidate John Rotluangliana chuan he inthlanna ah hian tlin ngei an inrin thu sawiin, Pathian leh mipuite khawngaihna zara a tling anih chuah an kawng chhe lutuk chu hna hmasaa a neih tur thu a sawi a. MNF Candidate Dr. R. Lalthangliana pawhin tun by-election ah hian a tlin ngei a inbeisei thu leh a tling a nih chuan bialtu MLA hmasa hmachhawp la tih puitlin loh te tih puitlin a tum thu a sawi a. Dampa Bial chu Aspirational District chhunga mi a nih anga thawh tur tam tak a awm thu sawiin, a khaw neitute nen inrawnna zau zawk nei a hmalak zel a nih dawn thu a sawi a ni.

Heti hian Dampa Bial-a Assembly by-election neih tur chuh turin mi pali (4) ten an hming an pelut ta a, hemi hmalam hian ZPM Candidate Vanlalsailova leh BJP Candidate Lalhmingthanga te chuan an hming an lo pelut tawh a. Election Commission of India duan lawk dan chuan he inthlan chuh tura hming pekluh theih hun hi naktuk, Oct. ni 21, 2025 chawhnu 3:00 thleng a ni a, heng hming pekluh te hi Oct. 22, 2025 chhun dar 11:00-ah enfiahin tun thla ni 24 thleng khian inhnuh-dawh theihna hun hawn a ni ang.