Lakhuihthei atangin kumin ah sum lalut tam

Mizoram-a Lakhuihthei tharchhuak tam ber Sialhawk khua chuan kumin atan Lakhuhthei an hralh zo ta a. Sialhawk khuaah hian tun dinhmun ah chhungkaw 240 velin Lakhuihthei hi chingin Mizoram-a Lakhuihthei tharchhuah zawng zawng atangin zaa 64 vel an tharchhuak pha a ni. Sial-hawk khua hian kumin hian Lakhuihthei quintal 11,240 vel an tharchhuak a, an hralhna leh a kaihhnawih atangin Rs. 1,75,20,000 vel an la lut a ni. Sialhawk khua hian inremna an siam angin kumtirah Guwahati a North East Aeromatic Company hnenah Lakhuihthei hi Kg. 1 Rs.10/- in an hralh a, amaherawhchu kawng chhiat avangin Company lam hian vawikhat bak an laksak thei ta lova. An Lakhuihthei thar-chhuah te tualchhung leh khaw chhehvelah te theih ang anga tihralna tur an zawn laiin August ni 13 atang khan Chhingchhip-a MIFCO hmunah an hralh a, MIFCO hian quintal 170 leh kg.88 an leisak hman a. MIFCO-ah hian chawlhkar hnih vel Lakhuihthei an hralh hnuah a bak zawng chu tualchhung leh khaw chhehvelah te an hralh a. Thla hlui ni 25 vel khan kumin atan Lakhuihthei a hlawm a hralh chhuah chu an zofel a ni.