MNF Party huaihawtin Mizoram-ah FCAA 2023 dodalna Total Bandh neih a ni

Mizo National Front (MNF) Party chuan nimin khan Forest (Conservation) Amendment Act, 2023 (FCAA) dodalnaTotal Bandh chu Mizoram pumah an buatsaih a, he Total Bandh hi tlai dar 4:00 thleng neih tura ruahman ni mah se nimin chawhnu dar 1:00 khan tihtawp a ni.

MNF Party in FCAA 2023 dodalna atana Total Bandh an huaihawt hi nimin zing dar 6:00 atang khan Mizoram pumah kalpui niin Serchhip khawpui chhungah pawh ruahman lawk angin kalpui a ni a, Serchhip-ah chuan Serchhip Bazar bakah Darnam Tlang, Sailiamkawn, AOC Veng, P&E Veng-a BDO Office Peng leh Soil Peng, IOC Veng, College Peng bakah Kikawn-ah te Duty Post siamin Chhiahtlang-a Duty Post pahnih siam a ni bawk a, heng hmunah hian Total Bandh huaihawttu mi thahnem tak duty in buaina leh harsatna thleng palh thei lakah Dan leh thupek kengkawhtu Police te bakah Magistrate te an duty bawk a ni. Total Bandh huaihawt a nih avang hian mipui zingah pawna chhuak hmuh tur an awm meuh lo a, sawrkar Pisa kai tur leh zirna In kai tur dan ngai awm lovin dawr leh sumdawnna hmun te khar a ni bawk a, hetihlai hian pawimawh bik nei leh chhiat tawhna-a kal turte chu dan ni lovin boruak tha tak hnuaiah Total Bandh hi kalpui a ni a, chawhnu dar 1:00 khan tihtawp a ni zui ta a ni.

MNF General Headquarters thuchhuah chuan sawrkarin FCAA 2023 a pawm leh Legislative Assembly-a a pawm ve duh lohna leh sut leh tura phutna atana Total Bandh an huaihawt chu mipuiin an thlawp that avangin lawmawm an tih thu an sawi a, mipuiin an thlawpna a that avang leh an ngenna a lan fiah tawka an ngaih avangin a tira ruahman aiin Total Bandh hi an titawp hma a tih an sawi a. MNF Treasurer Lalruatkima chuan nimin chawhnu dar 1:00 khan Aizawl-a an party Office-ah thuthar thehdarhtute kawmin Total Bandh an huaihawtin thlawp a hlawh that avanga an lawmthu sawiin, mipui, sawrkar, Political Party, sawrkar hnathawkte leh zirlaiten an thlawp thaa a hriat thu a sawi a, ‘In dan buai ngai pakhatmah kan awm lo te hi lawmawm kan ti takzet,” a ti a. Total Bandh huaihawt chu Mizoram Sawrkarin FCAA a pawm an do tawpna a ni lo tih pawh sawiin, “A hlawhtlin hma chu kan bawhzui zel dawn. He dan tha lo tak hi kan duh lo. Pathian leh mipui zara kan sawrkar velah kan siamtha nghal ang,’ a ti bawk.

Serchhip District chhunga khaw dang Thenzawl, East Lungdar leh Chhiahtlang-ah te pawh Total Bandh hi kalpui a nih thu thudawnna chuan a sawi bawk a ni.