Vawiin-ah FCAA 2023 dodalna Total Bandh Serchhip-ah pawh neih a ni dawn

MNF party chuan Vawiin October 29, 2025 hian Forest (Conservation) Amendment Act, 2023 dodalna Total Bandh chu Mizoram pumah an nei dawn a, Serchhip-ah pawh Total Bandh hi zing dar 6:00 atanga kalpui tur niin mipuite chu he Total bandh hi thlawp theuh turin an ngen a ni.

Nimin-a thuchhuah an siamah MNF Party chuan Mizo National Front Rorelna sang, National Executive Meeting (High Command) in alo rel tawh angin loh theih lohva FCAA 2023 dodalna Total Bandh neih a ngai ta chu pawi an tih thu sawiin, “He Act an pawmna hnukkir leh tura Sawrkar kan ngenna in awmzia a neih tak loh avangin hnukkir leh tura Zoram mipuiin kan ngenna a taka kan lantir theih hun buatsaih alo ngai ta a ni,” an ti a. “Dan Sakei, Zoram pumpui Forest nei lova min chhuahtu leh kan inhumhimna dan hlu ber Article 371G engmah lova chantirtu FCAA 2023 hi kan hnawl ngam a ngai a. Hemi ngiat nana Total Bandh ni 29.10.2025 (6:00 Am - 4:00 Pm) hi min thlawp a, hemi nia duty a fehchhuakte min zah sak vek turin MNF chuan mipuite kan ngen tak meuh meuh a ni,” an ti a. “Kan ram, kan Hnam leh kan Sakhaw humhim nan he Bandh hmang hian Zoram mipuiten kan awmhmun theuha thlawpna min pek vek kan beisei a. Mipui thiltihtheihna hmanga he Dan tha lo hi hnawl a nihna a taka lantir theitu vek kan nihna hre renga, tluang taka he Band hi neih a nih ngei MNF chuan kan beisei tlat a ni,” an ti bawk.

Vawiin a Total Bandh hi Serchhip-ah pawh zing dar 6:00 atanga kalpui turin Serchhip East Block MNF chuan ruahmanna an siam a, Serchhip khawpui chhunga hmun pakua (9)-ah Duty Post siamin, Total Bandh an neih tur hi Serchhip mipui zawng zawng ten ram leh hnam himna tur a nih tih hria a thlawp vek turin Serchhip East Block MNF chuan mipuite ngenin an sawm a ni.

Serchhip-ah chuan he Total Bandh neih tur hian Magistrate te, Police/Law & Order keng-kawhtute, PHE, Health & Emergency Duty Bawnghnute Sem leh Media Persons te a huam dawn lo a ni.