Chhingchhip-a Sawhthing, Hmarcha leh Aieng sawngbawlna tur RD&A Minister in a hawng

Ropuiliani Women Farmer Producer Company Ltd. ten Chhingchhip-a MIFCO hmuna Sawhthing, Hmarcha leh Aieng sawngbawlna, Primary Processing Plant an bun chu nimin khan Rural Development & Administration changtu Minister Prof. Lalnilawma chuan a hawng.

Ropuiliani Women Farmer Producer Company Ltd. ten an Member te tharchhuah Sawhthing, Hmarcha leh Aieng te sawngbawlna tura Primary Processing Plant an bun thar hawnna hunah hian Rural Development & Administration changtu Minister Prof. Lalnilawma chuan kut hnathawktuten an thawhrah an hmuh chu a pawimawh ber tih sawiin, “Mi harsa zawk ten leirem an rah theih nan i tang tlang zel ang u,” tiin kalkhawmte a sawm a. MIFCO-in Chhingchhip-a an hmunah Ropuiliani WFCL-te thlai thar sawngbawlna tur khawl bunna tur hmun an pe chu lawmawm a tih thu sawiin, Self-Help Group nuho leh kuthnathawktute tan a tangkai hle dawn a ni, a ti a. Market linkage chungchangah kan thlai thar te State pawna hralhchhuak thei turin quality tha a pawimawh thu pawh sawiin, tuna khawl thar bun tak hian thlai thar, a bik takin Sawhthing, Hmarcha leh Aieng hralh kawngah a hlutna a tisang hle dawn tih a sawi a. Reliance Mumbai te nen inremna thuthlung an ziah chungchangah Prof. Lalnilawma chuan Thlawhnaa thlai thar thawnchhuah a ngaih thin avangin a senso a sang a, tunah chuan tlawm zawka thawn theihna turin Mizoram in Rel service a neih tak avangin chhunzawm an tum thu a sawi bawk.

He hun hi MzSRLM-a CEO Zosangzuali Pachuau chuan kaihruaiin MIFCO Chairman Lalthazuala Rawite chuan kalkhawmte lawmna thu a sawi a. Ropuiliani WFPCL-a CEO Henry Saingura chuan Sawngthing sawngbawlna khawl bun a nih chhoh dan leh an hnathawh dan tur (Technical Report) a pe a. Dr Zomuankima, Chief Opening Officer, MzSLRM chuan lawmthu sawiin hun a khar a ni.

Mizoram State Rural Livelihood Mission (MzSRLM) hnuaiah Mahila Kisan Sadhaktikaran Pariyojana Project kaltlangin Ropuiliani Women Farmer Company Ltd hi kum 2020 khan din a ni a. COVID hripui leng vangin harsatna an tawh hnuah kum 2023 atang khan chak zawkin hma an la chho a. Mizoram District 7-a Rural Development Block 16, khua 154 tuamchhuakin Member 5335 an nei mek a ni. Ropuiliani Producer Company-a Share Holder te tharchhuah Sawh-thing, Mizo Hmarcha leh Aieng te man man zawka lei sakin, a hlutna tipung tura sawngbawl a nih hnuah an hralhchhuah leh thin a ni a. Kumin ah pawh theihtawp chhuaha lei sak leh tumin chutianga kuthnathawktute thlai lei sak tur chuan Ropuiliani Company-ah hian inziahluh a ngai thung a. He Company a inziaklutte chu SHG member an ni tur a ni a, anni hian Rs. 150 (share) pe in Company neitu nihna an nei thei a ni.

Nimin-a he hun hman ah hian Khuallian hian Sawhthing, Hmarcha leh Aieng sawngbawlna, Spices Processing Centre chu a hmunah tlawhin, an khawl bunin hna a thawh dan tur enchhinna (trial run) neih nghal a ni a. He khawl hian thlai thar tihfai leh tihro hna bakah, hralhchhuah tura her sawm leh chan sawm hna a thawk dawn a. Elevator Conveyor (thlai phur chho tu), Drum Washer (lei tifaitu), Bubble Washer Conveyor (silfaitu), Air Dryer Conveyor (a chhem rona), Slicer Machine (a chansawmna), Heat Pump Dryer (tirotu) te a keng tel a ni.

Ropuiliani WFPCL Primary Processing Plant hawnna inkhawmah hian Serchhip Bawrhsap Paul L. Khuma, Rural Development Director K. Lalrohlua, SIRD& PR Director R. Lalremsanga bakah bakah Department hotute leh thawktute bakah Ropuiliani Women Farmer Company Ltd Board of Directors te an tel a ni.