Mizo thu leh hlaa thawhhlawk te chawimawina Pu Buanga Award chu C. Chhuanvawra hlan a ni

Mizo Academy of Letters (MAL), Joint Headquarters, Lunglei chuan C. Chhuanvawra hnenah ‘Pu Buanga Award’ chu nimin khan an hlan.
MAL Joint Headquarters, Lunglei hian Mizo thu leh hlaa thawh hlawkte hnena ‘Pu Buanga Award’ hi kum thum (3) dan ah an hlan thin a, nimin khan Lunglei-a Art & Culture Auditorium-ah he Award hlanna hun hi buatsaihin tun tumah hian C. Chhuanvawra hnenah he Award hi hlanin Lunglei South Bialtu MLA Lalramliana (Papuia) chuan a hlan a ni. Award dawngtu C. Chhuanvawra hi October ni 2, 1941 khan Leithum-ah piangin kum 14 chauhva upa niin Khuangphah Primary School-ah zirtirtu hna a thawk a. kum 1975 khan BA (Bachelor of Arts) zo in School hrang hrangah thawkin kum 2003 khan Zirtirtu chawimawina sang ‘National Award to Teachers’ a dawng a, kum 2009 khan a pension a ni.

Kum 1993 atangin Mizo Academy of Letters (MAL)-ah member niin kum 16 mi chauh a nih laiin kum 1975 khan a thuziak hmasa ber, ‘Ka Hriat Ve Dan’ tih chu a ziak a. Hla 72 phuahin, Article 542 leh Seminar Paper 37 a ziak a. Kum 2023 thleng khan a lehkhabu ziah bu 17 chhuah a ni tawh a. Primary School atanga University thlengin a kutchhuak hrang hrang 26 zet zirlaibu ah seng luh a ni a. India ram Civil chawimawina sang ‘Padma Shri’ chu Literature huangah kum 2014 khan dawngin, National Award to Teachers (2002) bakah, Mizo Writers' Association leh Art & Culture Department buatsaih ‘Thu leh Hla Thiam Chawimawina’ te pawh alo dawng tawh a ni.

Pu Buanga Award hi kum 2000 atang khan Mizo thu leh hla lama thawh hlawkte chawimawina atan hlan thin a ni a, a tir lamah kum 5 danah hlant?hin niin, kum 2015 hnu atang khan kum 3 danah hlan a ni ta a. Lalsangzuali Sailo (2000), B. Lalthangliana (2005), Prof. Laltluangliana Khiangte (2010), Lalthangfala Sailo (2015), RK Lalhluna (2018) leh Prof. RL. Thanmawia (2022) te hnenah hlan tawh niin, kumina hlan C. Chhuanvawra hi Pu Buanga Award dawngtu pasarihna a ni a. He chawimawina hian Tangkapui (Trophy), thuchei (certificate) leh pawisafai Rs. 10,000/- a keng tel a ni.