Mizoram State University atan inbuatsaih mek zel

Mizoram State University (MzSU) din turin inbuatsaihna kalpui mek a ni a, College kalpuina tur pawh ruahman fel a ni tawh.

    Mizoram State University hi College awmsa te hmang tangkaiin Clustered University kalphunga din tum a ni a, NEP 2020 duh dan angin State University hi Multidisciplinary-a kal a ngaih avangin College eng emaw zat chu sawikhawm (cluster) tum niin Resource neih sa inhmantawm theih chu inhmantawm tura ruahmanna siam a ni. Sawrkar in ruahmanna a siam dan chuan Aizawl Luangmual-a Directorate of Geology and Mining hmun-ah Mizoram State University Administrative Building leh Building dangte awmin Govt. Aizawl West College Campus, Luangmual-ah School of Social Sciences a awm anga, Govt. Aizawl College building, Sikulpuikawn chu Administrative building sak laia luah lailawk tur niin Govt. Aizawl College Campus, Salem Veng, Mualpui-ah School of Humanities & Education a awm anga, Govt. Hrangbana College, Muthi-ah School of Economics & Management awmin Govt. Zirtiri Residential Science College Campus, Durtlang-ah School of Sciences a awm bawk ang. Heng bakah hian Mizoram Engineering College, Pukpui, Lunglei-ah School of Engineering & Technology a awm bawk ang.