Pharmacist mamawhna a sang tih Minister in sawi

Health & Family Welfare Minister Lalrinpuii’n Mizoram damdawi In hrang hrangah Pharmacist mamawhna a sang hle tih sawiin, thingtlang lama PHC-ah te chuan Pharmacist post ruak a tam hle a tih sawi.

Nimin a Blessino Pharmacy Institute a hawnna leh Blessino Nursing School 7th Capping, Lamp Lighting & 4th Graduation Ceremony a hmanpuinaah sawiin Health Minister Lalrinpuii chuan hmanlai atanga Vawiin thlengin mihringte leh natna an indo chhoh mek karah Pharmacy pawh khawvel changkan dan a zirin hma a sawm chho zel tih a sawi a, zirlaite leh zirtirtute chu hemi mila inherrem zel turin a fuih a ni. Health Minister chuan India-ah damdawi khuahkhirhna dan hman mek, The Drug and Cosmetic Act, 1940 leh The Drug and Cosmetic Rules, 1945 chuan State sawrkar hnenah thuneihna sang tak a pe tih pawh sawiin, he dan hnuaiah hian damdawi dawr nei tur reng reng chuan Pharmacist a nei ngei ngei tur a ni a, hei bakah hian damdawi In hrang hrangah Pharmacist mamawhna a sang hle tih sawiin, thingtlang lama PHC-ah te chuan Pharmacist post ruak a tam hle a tih a sawi a, Pharmacist te chu an pawimawh zual zel dawn tih a sawi a ni.

Health Minister chuan sawrkar chuan a thlawna damlo enkawlna, Mizoram Universal Health Care Scheme (MUHCS) a kalpui chho mek ah mipui mamawhna avangin sawrkar damdawi In, PHC leh CHC te chu tun aia tangkai zawka mipuiten an hman theihna turin an thuam tha mek zel tih a sawi a, Nurse te chu mipui hriselna kawngah an tangkaiin mipuiten an thlamuapui hle tih a hre thar zel tih pawh sawiin, an pawimawhna chuan mawhphurhna lian tak a keng tel tih hre reng turin Nurse zirlaite leh zirchhuak te chu a chah a ni. 

Blessino Nursing School hi kum 2019-a din niin Class hmasa ber chu November 2019-ah neih tan a ni a, Indian Nursing Council leh Mizoram Nursing Council pawmpui niin Blessino Pharmacy Institute hi kum 2024 khan din a ni bawk a. Batch tinah zirlai 30 zel awmin kumin hian zirlai Graduate thar 26, Zirlai thar 30, Nurse zirlai 89 leh Pharmacy Zirlai 60 an awm a. College of Nursing, Synod Hospital Durtlang atangin C. Lalrintluangi chuan he hunah hian Capping and Lamp Lighting Ceremony hi a hmanpui a, Dr. C. Lalramdini Asst Professor, RIPANS chuan Graduate thar te Certificate a hlan a ni.

Maubawk-a awm Blessino Nursing School hi Parent Hospital chu Aizawl Hospital and Research Centre niin, Affiliated Hospital Civil Hospital Aizawl, Zoram Medical College, Kulikawn Hospital, Mizoram Cancer Institute, Aizawl Adventist Hospital leh Greenwood Hospital-te an nei a. An zirlai kalchhuakte Japan-a an thawh zawm theih nan GS Agency, Japan nen inremna thuthlung an ziak tawh bawk a ni.