YMA Inkhawmpui Lian vawi 75-na zofel; Kum 2027-ah Vairengte-ah neih leh a ni ang

Sakawrdai khuaa YMA Inkhawmpui Lian vawi 75-na neih chu nizan hmasa khan zawhfel a ni ta a, kum 2027-ah YMA Inkhawmpui Lian hi Vairengte-ah neih leh tur niin kum 2025-2027 chhunga YMA Kumpuan atan ‘Ruihhlo Do’ tih chu thlan a ni bawk.

Mizoram-a tlawmngai pawl lian ber, Young Mizo Association (YMA) Inkhawmpui Lian vawi 75-na hi tunkar Thawhlehni zan atang khan Sakawrdai Playground-a Chengkawlawn Run-ah neih a ni a, Nilaini khan Palai ten Rorel Inkhawm neiin YMA Khawih an rel zingah ‘YMA inkaihhruaina leh nihphung leh hruaitute mawhphurhna rampumah inzirtira neih ni rawh se’ tih te; ‘Mizoram chhunga hnamdang sumdawng, phalna nei lo tam ta lutuk hi titlem turin YMA-in hma la rawh se’ tih te; ‘Mizo hmeichhia ten namdang pasala an neih zel loh nan Central YMA hian inzirtirna nasa zawkin kalpui rawh se’ tih te; ‘Mizo Infiamna te chawisan a nih theih nan Central YMA in hma la rawh se’ tih leh ‘Zohnahthlak chi peng hrang hrang Mizoram a chengte zingah chi bil hmalakna a awm tawh loh nan Central YMA in hma la rawh se’ tih te chu pawm a ni ani.

Sawrkar Khawih an rel zingah ‘Inner Line Permit (ILP) hi tun aia khauh leh awmze nei zawka kalpui a nih theih nan YMA-in Sawrkar-ah thlen rawh se’ tih te; ‘Tui hnar humhalh dan siam ni rawh se’ tih leh ‘Mizoram chhunga inkalpawhna kawngpui hrang hrang a chhiat avanga mipuiten harsatna kan tawk nasa lutuk thin hi a lo ziaawm theihnan Mizoram Sawrkarin tun aia chak zawkin hma la rawh se’ tih te chu pawm a ni a. Kum 2025-2027 Kumpuan atan ‘Ruihhlo Do’ chu thlangin kum 2027-a YMA Inkhawmpui Lian chu Vairengte Joint YMA thlen turin Vairengte-ah nghah a ni bawk a, kum 2025-2026 atan Rs. 21,149,935/- chu pawm a ni bawk. 

Ningani khan kum 2025-2027 chhunga Central YMA hruaitu tur thlanna neih niin President-ah R. Lalngheta (Hlimen Branch); Vice President-ah Prof. Lalnuntluanga (New Capital Branch); General Secretary-ah Prof. Malsawm-liana (Vaivakawn Branch); Asst. Secretary-ah SF David Ngursangzuala Sailo (Dinthar Branch); Treasurer-ah Er. H. Duhkima (Dam Veng Branch) leh Fin. Secetary-ah MS. Ralte (Upper Repulic Branch) te chu thlan an ni a, tun tumah hian hruaitu nilai mi pathum an tling nawn leh a ni.

Kumin-a YMA Inkhawmpui Lian-ah hian YMA Branch 524 atangin Palai riaklut 5276 an awm a ni.