FCAA-ah MNF leh ZPM te hi inbei tur bik awm lo, mawhphurtu ve ve an ni tih MPCC in an sawi

Mizoram Pradesh Congress Commitee (MPCC) chuan Forest (Conservation) Amendment Act (FCAA), 2023 chungchang ah MNF leh ZPM te chu inbei tur bik an awm lo nia sawiin, “Mawhphurtu an ni ve ve,” an ti.

Nimin a thuchhuah an siamah MPCC chuan Parliament-a Forest (Conservation) Amendment Act (FCAA), 2023 siamtu BJP leh a thawhpui National Democratic Alliance (NDA) sawrkar an dem thu leh he Dan thalo tak pawmpuina resolution Mizoram Assembly House-ah ZPM sawrkar in a lo passed chu Mizoram tana pawi tak a nih avangin tha an ti lo takzet tih an sawi a. “Dt. 26th July, 2023-ah FCA Bill Parliament a sawiho a nih khan Congress MP ten nasa takin an dodal a. He bill hi Congress MP ten nasa taka an dodalna karah Parliament a passed a ni a. Khami Bill passed a nih nî khan MNF MP (LS) pawh Parliament-ah BJP te lamah a thu ngei a ni. MNF hian he FCAA hi an dodal tak tak a nih chuan he Dan siamtu BJP an thawhpuina NDA hi chhuahsan se la, BJP nen an thawhdunna hi chhuchat ngam rawh se,” an ti.

Kum 2019 MP inthlan dawnah ‘Citizenship Amendment Bill (CAB) kan do ang’ tiin MNF an intiam nasa tih pawh MPCC chuan sawiin, “Mahse thlantlin an nih hnuah Lok Sabha-ah a bill support tu an ni leh si a. CAB an support chhan NE States a huam ve lo nia an sawi ang khan, FCAA in NE States huamtir ve lo tura an thawhpui NDA sawrkar an nawr thlu thei a nih loh chuan FCAA dan passed tu te zingah MNF MP an tel avangin he dan hi do ve thei an ni lo tih leh Dampa by-election vote zawnna avanga Total Bandh nei ah MPCC chuan MNF te hi kan ngai a ni,” an ti a. Chief Minister in Sakawrdai-a YMA khawmpui Lian neih ah FCAA huam chin tur International boundary atanga KM 10 nia a sawi chu thudiklo a nih thu pawh sawiin, “CM hian thupha a chawi lo a nih chuan thudiklo hmanga FCAA hlauhawmlo anga mipui zirtir tumna ni ah MPCC chuan a ngai,” an ti.

Hei bakah hian MPCC chuan Dampa Bial chu Bangladesh hnaihte an nih avangin FCAA tuar ber tur an nih thu pawh sawiin, “He dan thalo tak passed tu zinga tel BJP leh an thawhpui MNF te, Mizoram Assembly a resolution passed a lo pawmtu ZPM te hi Dampa Bial mipui ten lo hnawl turin kan ngen che u a ni,” an ti bawk a. Tun thla ni 15-a MPCC President in AICC hotute a hmuhna ah AICC Gen. Secretary KC Venugopal chuan Congress in thuneihna an chan veleh FCAA hi an ennawn nghal ang tih a lo hrilh thu pawh an sawi bawk a ni.