Chief Minister in Mizoram chu Lakshadweep dawta eirukna tlem berna State a nih thu a sawi

Chief Minister Lalduhoma chuan Mizoram chu Lakshadweep dawta eirukna tlem berna State a nih thu sawiin, kumin chhungin eirukna leh a kaihhnawih thilah ACB chu Preliminary Inquiry tih phalna 10 pek a nih tawh thu leh Regular Case siam phalna 5 pek an nih tawh thu a sawi bawk.

Vawiin, October 27, 2025 (Thawhtanni) atanga tunkar Pathianni thlenga hman tur ‘Vigilance Week, 2025’ puala a thuchah ah he thu hi sawiin Chief Minister Lalduhoma chuan ‘Vigilance Week’ chu kumtin Sardar Vallabhbhai Patel-a piancham, October ni 31 huamchhunga hman thin a nih thu leh hrui khat vuana eirukna leh hlemhletna do tura mipuite zirtir na’na hman thin a nih thu a sawi a, Mizoram sawrkar Vigilance Department pawhin kum 2018 atangin kumtin he Hapta hi a hmang thin tih a sawi. Chief Minister chuan eirukna chu hmasawnna daltu, mipuiten an chanvo dik an chan theihlohna bul, Pathian huat zawng a nih thu sawiin, mahni chhungkua theuhah eirukna do hna huai taka kalpui tur leh eirukna sum atanga lei thil reng reng duh lo ngam turin mipuite a ngen a ni. 

Chief Minister chuan eirukna laka fihlim theihna turin sawrkar laipuiin Prevention of Corruption Act, 1988 a siam thu leh sawrkar hnathawk te chu CSS Conduct Rules, 1964 danin a phuar thu a sawi a. PC Act, 1988 hnuaiah Anti-Corruption Bureau (ACB) leh Mizoram Lokayukta din a ni tawh tih sawiin, kumin chhungin eirukna leh a kaihhnawih thilah ACB chu Preliminary Inquiry tih phalna 10 leh Regular Case siam phalna 5 pek an nih tawh thu a sawi a. Transparency International in Corruption hluar lam tehna Corruption Perception Index, 2024-ah India chu ram 180 zingah 96-na a a dah thu leh kum 2023 aiin pathumin hma a sawn thu a sawi a. Transparency International leh NITI Aayog data behchhana CMS India Corruption Study in a hmuhchhuah danin Mizoram chu Lakshadweep dawta eirukna tlem berna State a nih thu leh thil chhinchhiah tlak leh chhuanawm tak a nih thu a sawi a ni.