Falkawn-a Zokhua-ah Living Museum hawn a ni

Art & Culture Minister C. Lalsawivunga chuan Inrinni khan Falkawn Zokhua-a Mizo Typical Village-ah Art & Culture Department buatsaih ‘Living Museum’ a hawng.

He hunah hian Art & Culture Minister chuan Living Museum buatsaih anih chhan chu thangthar te’n pipute khawsak dan leh nunphung an hriat thar nan te, tualchhung mite leh thalaite tana sum lakluhna hnar atan te, zinmite’n Mizo kutchhuak an hmuha an lei theih nan leh Mizo nihna leh hnam zia an zir theih nan a pawimawh thu a sawi a. Ei leh in pawh Mizo taka buatsaih a nih a, Living Museum chu tihchangtlun a nih chhoh zel a beisei thu a sawi a ni.

Live Museum Show hi a bul tan nan kartin Inrinni apianga neih tura ruahman a ni a. Art & Culture Department chuan October ni 25, November ni 1, ni 8 leh ni 15-ah te hian Live Museum a buatsaih phawt anga, a tul dan azira buatsaih chhunzawm zel tur a ni.

Mizoram State pawn atanga khualzin lo lut an pun belh zel avang te, tualchhung mipuite Local Tourism-ah kan harh thar zel avangte in chung mite en tur leh chhim theih tur chuan Mizo Culture leh Tradition chawilar zel nan Live Museum hi buatsaih a ni.