Thenzawl Peace City Master Plan siamtute kawm

Thenzawl Peace City Master Plan siam tura thlan IPE Global thuneitute chu Zirtawpni tlai khan Chief Minister Lalduhoma chuan a Pisa-ah kawmin an Company hmalak tawhna te a enpui bakah Peace City tana sawrkar hmathlirte a hrilh bawk.

He inkawmna ah hian Chief Minister Lalduhoma chuan Thenzawl Peace City chu Mizoram-a Plan City hmasa ber leh a awmchhun a ni dawn tih sawiin, khawpui changkang leh mawi tak, khualzin te tlawh nasat khua ni khawpa duan an duh thu a sawi a. Master plan-a an tihtel atana a ngaih pawimawhte hrilhin, tha tak leh chak taka thawk turin a hrilh a, a tul dan a zira State Project Monitoring Committee in an vil tur thu a hrilh bawk.

Sawrkar thuchhuah tarlan danin Thenzawl Peace City Master Plan siam hna thawh chung-chang Pre Bid Queries rawn ngaihventu hi Company lian tak tak 18 an awm a. Tender tihchhuah a nih hnuah uluk takin a chhangtute hi endik an ni a. Ram 100 aia tama hetiang lam lo thawk tawh, ram hrang hrang pangaa office nei, India ramah pawh Office hmun 20 a nei mek, India hmun hrang hranga City Master Plan lo siam tawh thin, IPE Global hi thlan an ni a. IPE Global hi Inremna hi ziahpui an ni tawh a, inremna ziah atanga hapta thum (3) chhungin Mizoram-ah Office an rawn hawng anga. An hna an tan nghal dawn a ni.

He inkawmna ah hian IPE Team hi an Senior Development Expert Anil Bansal leh a thawhpui Expert dangte nen an kal a. Mizoram sawrkar atangin UD&PA Minister K. Sapdanga bakah Official pawimawh GAD changtu Principal Secretary Sudir Kumar leh UD&PA Secretary Lalmalsawma Pachuau te an tel bawk a ni. Tarlan tawh thin angin Thenzawl Peace City project Detailed Project Report (DPR) siamna tur atan hian sawrkar laipui, Ministry of Housing and Urban Affairs (MoHUA) chuan cheng vbc. 10 a rawn sanction tawh a ni.