Lal Vandula Lungdawh leh Lalnu Ropuiliani thlan hawng

Nimin khan Minister B. Lalchhanzova chuan Hnahthial District-a Denlung khua ah ‘Lal Vandula Lungdawh leh Lalnu Ropuiliani thlan’ a hawng.

Nimin-a hawn Lal Vandula Lungdawh leh Lalnu Ropuiliani thlan hi Denlung Branch YMA leh Denlung khawtlang mipuite sak niin Mizo Mistiri ten an siam a ni a, Lalnu Ropuiliani lungphun hi ft. 5.4 a sang niin ft. 2.9 a hlai a ni a, Lal Vandula lungphun hi ft. 5.3 a sang niin ft. 3 a hlai a ni bawk a, a sakna tur hi Lalthuama Sailo (Ropuiliani tuchhuan Thumna, Hrangphunga thlah, Aithur lal Vanhnuai-thanga Sailo fapa) thawh niin cheng nuai nga (5) vel sen a ni a. Thlan hungna hi a vang ft. 12 niin a dung ft. 15 a ni bawk.

Nimin-a hemi puala hun hman ah hian Minister B. Lalchhanzova chuan Ropuiliani chanchin tawi sawiin, Mizo hnam tana a inpekna chu tangkam maia sawifiah theih a nih loh thu a sawi a. Lalnu Ropuiliani thlan hawn tak hian mitin thinlungah hnam tana inpekna tuh thar leh se a duh thu sawiin, chumi atana pawimawh, rinawmna, huaisena leh mahni hnam tana din ngheh tlatna rilru pu theuhva, chu chu midang tih tura dah lova, mahni mawhphurhna theuhva dah turin kalkhawm te chu a chah a ni.

He hunah hian South Tuipui Bialtu MLA Jeje Lalpekhlua chuan Khual Zahawm niin Mizo ten mi ropui kan neih lar berte zing ami, hmeichhe dinhmun chawisangtu Lalnu Ropuiliani thlan an hawng thei chu lawmawm a tih thu sawiin, a nun ah zir tur tam tak a awm thu a sawi a. A sulhnu atangin rinawmna, mahni tanhmunah theihtawpa tan ngamna zir chhuak turin mipuite chu a sawm a. Hnahthial Bawrhsap K. Vanlalruati pawhin Denlung khua chu hmanlai sulhnu pawimawh ngaihlu thiam an nihna ah fakin, khaw lian tak ni lo mah se Hnahthial District tan mai ni lo, Mizoram tana hmun pawimawh tak a ni thu a sawi bawk.