‘Ruihhlo-in a hneh theih loh State’ ti a khawvel hriat tura theihtawp chhuah a tul thu Larsap in a sawi

Mizoram Larsap General (Rtd) Vijay Kumar Singh chuan ruihhlo in tualchhung-ah bu a khuar hneh hle tawh nia a hriat thu sawiin, ruihhlo do turin mitin tanrual a pawimawh thu leh Mizoram chu ‘Ruihhlo-in a hneh theih loh State’ ti a khawvel hriat leh hmuh theiha phochhuah tum tura theihtawp chhuah a tul thu a sawi.

Ruihhlo laka thalaite an fihlim theih nana WATO Trust hmalakna, 'Project Bramhastra' kaltlangin Inrinni zan khan Aizawl Mualpui Salem Veng-a Rajiv Gandhi Stadium-ah 'Football Exhibition Match- Awareness Campaign Against Narcoterrorism' neih a ni a, he hun hi a hmanpuina ah Larsap chuan WATO Trust hmalakna ‘Project Bramhastra’ hnuaia Sports hmanga ruihhlo dona Campaign hrang hrang Mizoram-a kalpui a ni chu lawmawm a tih thu sawiin, thupui atana ‘Khawvel pum hi chhungkhat vek an ni’ (Vasudhaiva Katumbakam) tih hmanga Founder & President Dr. Yogita Karache leh a thawhpuite inpekna fakawm a tih thu a sawi a. Khawvel hmasawn zelah buainate pawh khirh chho zelin thangtharte tana hlauhawm tak ruihhlo in min runna pawh a rawn nasa telh telh tih a tarlang a, ruihhlo chuan muangchangin, thawm dim takin kan taksa, ngaihtuahna leh thlarau nun thlengin a khawih chhe hret hret thin a; chhungkua, khawtlang leh rampum min run a, min ei chhe mek zel a ni, a ti bawk.

Larsap chuan ruihhlo dona Movement, Project Bramhastra pianna leh bultanna Mizoram a ni chu chhinchhiah tlak a tih thu sawiin, ramri kaltlanga ruihhlo tawlhrukna kawng pui kan nih avangin ruihhlo hneh turin kan zavaia tanrual a tul thu a sawi a. Project Bramhastra hnuaia ruihhlo dona campaign-a Basketball Team 104 lai an in register chu lawmawm a tih thu sawiin, thalaite chu an hun hman nan khawlai nun hnawla, infiamna tualzawl thlang zawk thin turin a chah a. Mi hriathlawh tak tak te'n Project Bramhastra tuipuia an tawiawm chu fakawm a tih thu pawh sawiin, “He Project hian Sports hmanga mi danglam bik - taksa hrisel, rilru hriam leh thlarau nun thlenga mi chak siam a tum a ni,” a ti a. Infiammi, zirlai, milar, nu leh pa leh zirtirtute chu ruihhlo do kawnga tangrual tlat tur leh Mizoram chu ruihhlo in a hneh theih loh State ti a khawvel hriat leh hmuh theiha phochhuah tum turin a chah a ni.

WATO Trust hian ruihhloin kan ram nasa taka a run mek laka thalaite chhanchhuah nan ‘Project Bramhastra’ hmalakna an kalpui mek a. Infiamna chu ruihhlo ngawlveina laka tal chhuahna hmanrua leh inthununna tha tak, rilru leh taksa hrisel nei tura pawimawh a nih vangin, hemi hmanga ruihhlo do hmalak chu an tum ber a ni a. Hemi atan hian Mizoram chu hmalakna hmun pawimawh hmasa atan an thlang a ni.