Mizoram-ah Brahmaputra Board thutkhawm neiin Chief Minister Lalduhoma’n a telpui

Brahmaputra Board Meeting chu nimin khan Aizawl-a Planning and Programme Implementation Department Conference Hall-ah neih a ni a, he Meeting hi Mizoram sawrkar-a Irrigation and Water Resources Department chuan thlengin Chief Minister Lalduhoma chuan he hun hi a hmanpui a ni.

Brahmaputra Board hi Brahmaputra leh Barak lui-a luang lut lui, NE States-a lui hrang hrang te enkawltu, thuneihna sang tak nei a ni a, NE States hrang hrangte bakah Sikkim leh West Bengal-te pawh he Board-ah hian telin nimin a thutkhawm hi an Chairman Dr. Ranbir Singh, IAS (Rtd) chuan a kaihhruai a, Ministry of Jal Shakti atangin Joint Secretary & Financial Adviser, Gaurav Masaldan chuan a rawn telpui bawk a. NE States hrang hranga Tui leh a kaihhnawih Department enkawltu Secretaries-te chu Board Member an nih angin he Meeting-ah hian an tel a. Agenda pawimawh tak tak ngaihtuah leh sawiho niin, heng zingah hian Mizoram atanga project proposal pali a tel a ni.

Chawhnu lamah Aizawl leh Lunglei tui tlan ber Tlawnglui pawimawhna leh a lui tui tlem zel tihpun dan tur sawihona, ‘Stakeholder Consultation on Revitalising Tlawng River through Springshed Management & Allied Strategies’ neih a ni a. He hunah hian Sawrkar Department hrang hrang leh MZU, Central YMA, Save the Riparian, Centre for Environment & Social Justice leh Project Save Tlawng te an tel a. IIT Roorkee atanga mithiam lo kal te bakah PHE Department leh Irrigation & Water Resources Department atangin paper present ngaihtlak leh sawiho a ni bawk a. He hun hi Chief Minister Lalduhoma chuan hmanpuiin tuihna leh lui humhalh kawngah hmalakna hrang hrang awm thin mahse, khawpui thang zel avanga kan tui mamawhna a pun zel avangte, ramngaw thiah avangte leh sik leh sa inthlak danglam nasa avangte in Tlawng lui pawh nasa takin a nghawng mek thu a sawi a. IWRD, Brahmaputra Board, PHED leh IIT, Roorkee tangkawp ruahmanna hian Tlawng lui leh a fintu lui te zawk humhalhna huang zau zawka kalpuina tur a nih angin, Tlawng lui leh a chhunga cheng nungchate humhalhna leh hmasawnna inbuktawk thlen tirna kawngah hmasawnna nasa zawk a thlen ngei a beisei thu a sawi a. Mizoram Sawrkar chuan hemi kawnga hmalakna chak zawka kalpui a nih theih nan ‘Mizoram (Protection of Rivers) Act, 2023’ chu a lo pawm tawh thu a sawi bawk a ni.

Chief Minister chuan Brahmaputra Board leh IIT Roorkee-te nen Mizoram Sawrkar chuan thawhhona tha tak a kalpui mek thu pawh sawiin, Mat lui zirchianna, nungchate humhalhna, luidung-a eizawnna siam leh luidung inkalpawhna tha siamna turin ‘Mat Valley Integrated Water Resource Management and Climate-Resilient Irrigation Project’ kalpui mek a nih thu a tarlang a. Kan lui luan dan leh an dinhmun dik tak hriat theihna turin ‘State Water Informatics Centre’ pawh a taka kalpui mek a nih thu a sawi a. Leilung hausakna, a bik takin tui chu hausakna intawm a nih thu tarlangin, Tlawng lui humhalhna leh a chawmtu tui hna tihchakna chuan kan thenawm State chawmtu pawimawh tak, Barak River Basin-te pawh a tha zawngin a nghawng zel dawn thu a sawi a, Tlawng leh Mat River Project tih hlawhtlinna tur hian kalkhawmte chu thawhhopui ah a sawm nghal bawk a ni.

Mizoram sawrkar-a Irrigation & Waters Resources Department hian Brahmaputra Board puihna in Springshed Management Pilot Project (100% funding) Dialdawk leh Sihphir-ah a lo kalpui tawh a, heng project te a hi hlawhtling hle nghe nghe a. Tunah hian Tlawng lui tuihna tipung tura hmalaknana DPR siam chu Brahma-putra Board hnuaiah IIT Roorkee in a kalpui mek a. Lui tuilian in leilet ram tha a tihchhiat venna tur proposal IWRD in a thehluh ‘Anti Erosion Scheme or Flood Management Programme’ atan DPR pawh duan mek a ni bawk.