EIBTC din chungchanga hmalakna CAG in a sawisel

Comptroller and Auditor General of India (CAG) chuan an report thar berah Mizoram sawrkarin cheng vbc. 4 leh nuai 39 senga Aizawl Zuangtui Veng-a Export Import Business Training Centre (EIBTC) a din chungchang chu na takin a sawisel.

CAG chuan EIBTC chu heti zat pawisa seng tawh si a kum 10 liam hnu pawha hna thawh zawh a la ni lo chu thil fel lo tak a nih thu a sawi a. He hmasawnna hna atan hian Ministry of Commerce & Industry ruahmanna hnuaiah Chief Secretary kaihhruai State Level Export Promotion Committee (SLEPC) chuan kum 2010 khan project an siam a. He hmunpui din tur hi mahni kutkawiha eizawng leh zirlaite'n thil siam lakluh leh thawnchhuah an zirna hmun tur atana ruahman a ni a, thil zawrh leh hralh dan phung leh zawrh tur thilte changkang zawnga ruahman a, Mizoram dinhmun chawikan chu a tum ber a ni. Hetihlai hian sum hman dan endiktute chuan thil felhlel lian tham tak tak an hmuchhuak thung a ni.

CAG Report-in a tarlan danin Export Promotional Industrial Park Authority (EPIPA) Project Director chuan kum 2021 June thla khan General Financial Rules 2005 rule 150-na bawh-chhia in Tender chhuah lovin Architectural Consultant a ruat a. A hnu ni 2 (hnih) chhung leka an Consultant ruat chuan cheng vbc. 6 leh nuai 25 senna tur ruahmanna (concept note) a siam peih a, hetah hian Consultancy Fee cheng nuai 30 a tel a. A hna zawh hun tur engmah bithliah a awm lo a ni.

Export Import Business Training Centre (EIBTC) din hna hi SLEPC-in cheng vbc. 4 leh nuai 39 a pek hmangin kum 2012 November thla khan tan a ni a. Kum 2016 khan sum pekchhuah hi hmanral vek a ni tawh chungin hna thawh tur za zela 70 chauh thawh hman a ni.