MUHCS atan July - Sept. ah cheng vbc. 35 pechhuak

Mizoram Universal Health Care Scheme (MUHCS) atan July leh September thla inkar chhung khan Mizoram sawrkar Finance Department-in cheng vbc. 35 a pechhuak.

MUHCS kalpuitu damdawi In ten he ruahmanna hnuaia inziaklut damlo an enkawlna senso phuhruk nan kumin July atanga September thla inkar chhung khan Finance Department chuan Mizoram State Healthcare Society (MSHCS) hnenah cheng vbc. 35 a pechhuak a. Pawisa hi Mizoram chhunga MUHCS kalpuitu damdawi In te hnenah an pe tawh a. MSHCS hotute chuan Akashvani Aizawl zawhna chhangin, July atanga September quarter atan khan Finance Department-ah MUHCS kalpuitu damdawi In ten damlo an enkawlna senso tura ruahman (proposal) cheng vbc. 35 an thehluh thu an sawi a. Finance Department hian cheng vbc. 35 hi corpus fund atangin MSHCS hnenah July ni 15 khan cheng vbc. 10 an pe a, August ni 4-ah vbc. 15 leh September ni 23-ah vbc. 10 an pe leh tih an sawi.

Heng sum an pekchhuah cheng vbc. 35 hi hmun hrang hranga sawrkar Damdawi In 77 leh MUHCS kalpuitu mimal enkawl Empanelled Hospital 20 bakah emergency-a Non-tEmpanelled Hospital-a in admit mi 699-te enkawlna senso atan an pek thu MSHCS hotute chuan an sawi bawk a ni.

MSHCS hotute chuan October atanga December quarter atan Finance Department-ah proposal cheng vbc. 60 an thehluh thu leh Finance Department atang hian tun quarter atan pawisa dawn la nei lo mah se buaipui mek a nih thu erawh an dawng tih an sawi a. Empanelled Hospital-te hi khum an neih zat atangin pawisa an mamawh tur hi chhût a nih thu leh Empanelled an awm belh chuan pawisa hi an la mamawh belh dawn thu an sawi bawk.