Shillong MHIP kum 25-na

MHIP Shillong Branch chuan nimin khan NEC Auditorium-ah Silver Jubilee an lawm a, he hun hi Chief Minister Lalduhoma chuan khuallian nia hmanpuiin Baryl Vanneihsangi, MLA chuan khualzahawm niin a hmanpui bawk a ni.

He hunah hian Chief Minister chuan Shillong Branch MHIP chu Zofa, Shillong-a khawsa leh zirlaite, damlote tan an tangkai thin thu sawiin, mi tam tak tan malsawmna a lo ni tawh thin thu a sawi a, “Shillong-ah MHIP Branch a awm tih kan hriat ringawt pawhin kan thla a muang a, hna tam tak thawk lova in inhriat lai hian mi tam takin kan thlamuanpui che u a ni,” a ti. He hunah hian Baryl Vanneih-sangi, MLA pawhin Shillong leh Meghalaya State khawsa Zofate tana rawngbawlna tha tak tak an lo kalpui tawhnaah MHIP te chu lawmthu hrilhin an kal zelna turah duhsakna a hlan bawk.

MHIP Shillong Branch Silver Jubilee lawmna inkhawmah hian an President  Lalhmingliani pawhin thu sawiin Secretary Laldawngliani Chhangte chuan report a pe a. Tunah hian member 375 vel an awm mek a ni.