Serchhip Damdawi In-a khum 20 dah belhna tur cheng nuai 40 sengin sak a ni dawn

Serchhip District Hospital sak hna thawh a nih avanga Khum indaihlohna sutkianna atana Khum 20 awm theihna tur Building thar sak hna chu nimin khan thawh tan a ni a, he Building hi Serchhip Joint VC te hmalakna a sak tur niin a sak hna pawh hi an kutken nghal dawn a ni.

Serchhip District Hospital Building sak that a nih avanga Building hlui thiah a nih hnuah Khum indaihlohna a nasa hle a, hei vang hian Serchhip Joint VC te chuan sawrkar thuneitute hnenah thlenin khum 20 awm theihna tur Building chu sak a ni dawn a, nimin October 20, 2025 khan a sak hna hi bul tan niin Serchhip CMO Office hnung-ah building hi sak a ni dawn a, Sq.ft. 720-a zau-in cheng nuai 40 senga sak tum a ni. Serchhip ZPM Block chuan he harsatna hi Bialtu MLA leh Chief Minister hnenah an lo thlen tawh thin thu leh Serchhip Joint VC te pawhin Chief Minister leh Health Minister hnenah lo thlenin Chief Minister hmalakna in Lok Sabha MP, Richard Vanlalhmangaiha chuan MP Fund atangin cheng nuai 20 a pek thu leh Chief Minister hian nuai 20 pe lehin, he sum hmang hian sak a nih dawn thu an sawi a ni.

He Building sak tur bul tanna hi nimin khan neih niin Serchhip Joint VC Chairman R. Sanghmingthanga chuan Serchhip District Hospital sak mek a nih avangin Hospital-ah khum indaihlohna a nasat thu sawiin, mi tam tak Aizawl lamah te refer an ni tih a sawi a, hei vang hian a bik takin mirethei te tawrhna a nasat thu sawiin, an mang-angin khum 20 tal dahbelh theihna tur ngaihtuahpui turin Chief Minister leh MP te hnenah an thlen thu leh kan harsatna hrethiama phal taka sum an ngaihtuahsak ta chu an lawm thu a sawi. He hunah hian Serchhip Block ZPM President V. Rozamliana pawhin Hospital sak chhunga khum 20 lo dahbelh lailawkna tur Chief Minister leh Lok Sabha MP ten an rawn tifel ta chu lawmawm a tih thu sawiin, rang tak leh tha taka sak zawh hlan mipuiin an nghakhlel hle tih a sawi bawk.

Serchhip District Hospital-a khum 20 dah belhna tur sakna tur sum hi Lok Sabha MP hnen atangin hmuh ni tawhin Chief Minister in nuai 20 a pe leh dawn a, Serchhip Joint VC ten a sak hna hi an kutken dawn a, thawktu tam zawk nen a hma thei ang bera zawh an tum thu an sawi a ni.