Mizoram-a FCI Kudam paruk-ah buhfai dinhmun a tha

Food Corporation of India (FCI) hotute chuan Mizoram-a FCI Kudam paruk-ah buhfai Metric Ton sing hnih chuang chhêkkhawl a nih thu sawiin, Mizoram sawrkar chu FCI hotute ILP exemption an pekna huang zauh tura an duh thu an sawi bawk.

Tunhnai khan FCI Aizawl Division Manager Bankim Phonglo chuan chanchinbu mite kawmin Mizoram-ah FCI chuan buhfai Metric Ton 31,842 lenna Kudam paruk an nei tih sawiin, hei bakah hian Sairang-ah Metric Ton 10,000 lenna tur Kudam an sak mek thu leh kumin December velah peih hman an beisei thu a sawi a. Mizoram-ah Open Market Sale Scheme-Domestic (OMSS-D) kalpuitu mimal/pawl pali an awm a; October ni 23 dinhmun angin Mizoram-a FCI Kudam paruk-ah buhfai MT 20,573.45 leh wheat MT 1,810.24 a awm mek thu an sawi a ni.

Mizoram-a FCI Kudam paruk - Bairabi, Kolasib, Bualpui, Aizawl, Lunglei leh Lawngtlai-ah te Bairabi-a Rêlin a rawn phurhluh te atangin buhfai phurh kual thin a ni a, Sairang-a Kudam peih a nih hunah Sairang atangin Aizawl, Lunglei leh Lawngtlai-a FCI Kudam-ah te buhfai sem kual a ni tawh dawn niin a sawi bawk.

Bankim Phonglo chuan Mizoram-a FCI hotute leh Regional Office, Shillong hotute tan Mizoram sawrkarin ILP ngaihhnathiamna (exemption) an pek avanga an lawm thu a sawi a; hmun hrang hranga FCI Official te tan pawh ngaihhnathiamna pek nise an duh thu sawiin, a bikin Mizoram nena innghêng reng Guwahati-a Regional Office leh Delhi-a FCI Headquarters lama an hotute Mizorama thil pawimawha an rawn kal dawnin ILP an dil zel a ngai a, a buaithlak châng a awm thin niin a sawi.