‘SARAS Fair’ leh ‘Self Help Group (SHG) Mela 2025’ te Aizawl Lammual-ah neih tan a ni

Mizoram Rural Livelihood Mission (MzSRLM) leh Urban Development & Poverty Alleviation (UD&PA) Department tangkawp buatsaih ‘SARAS Fair’ leh ‘Self Help Group (SHG) Mela 2025’ chu nimin khan Aizawl Lammual-ah neih tan a ni.

Tunkar Inrinni thlenga neih tur Sale of Articles of Rural Artisans Society Fair (SARAS Fair) vawi 11-na leh SHG Mela 2025 te hi UD&PA Minister K. Sapdanga chuan hawngin SHG chu eizawnna ngelnghet nei tura a mimal anga hmalakna kawnga harsatna awm thin sukiang tura thiamna leh theihna hrang hrang nei intelkhawm pawl a nih thu a sawi a. Mizoram khaw hrang hrang atanga Self Help Group member-te kutchhuak hralh tur leh phochhuahna hun tha MzSRLM leh UD&PA tangkawpa buatsaih a ni chu lawmawm a tih thu a sawi bawk.

He hunah hian khual zahawm RD Minister Prof. Lalnilawma pawhin 11th SARAS Fair leh SHG Mela chu Rural Development & Administration leh UD&PA hnuaia Self Help Group member-te tangruala stall 102 lai mipui tan tlawh theih a siam a ni chu SHG member-te leh a tlawhtute tan a hlawkthlakin an tangkaipui lehzual tur thu a sawi a. Arsa thianghlima kan intodelhna tur leh awlsam zawk leh sawt zawka sumdawnna kalpuina turin ‘Chhimphei Online Marketing Portal’ chu buatsaih a nih thu sawiin, On-line a arsa an mamawh angte chu chah mai theih a nih dawn bakah an duhna hmun ah an rawn dah mai theih tur thu (Delivery) a sawi bawk.

Mizoram State Rural Livelihoods Mission (MzSRLM) hmalakna in Regional SARAS Fair hi vawi 10 neih a ni tawh a, SARAS Fair-ah hian MzSRLM hnuaia Mizoram hmun hrang hranga Self-Help Group (SHG) ten an thil siamchhuah, Handloom product, Handicraft lamte leh an thlai leh thei tharchhuah atanga Processed Food an siamchhuahte chu zawrhchhuah thin a ni. Nikum khan Champhai-ah Hnahsin Kut nena buatsaih kawp niin SHG ten Rs. 57,85,197/- hu an bungrua an hralhchhuak a. Nikum December thla vek khan Aizawl-ah SARAS Fair hi buatsaih leh niin RD Block 28 atangin SHG member 100 chuang an tel a, he hunah hian Rs. 4,027,579/- hu bungrua hralhchhuah a ni bawk.

Kumin hian a vawi 11-na atan Aizawl Lammual-ah UD&PA nena tangkawpin MzSRLM leh MzSULM hnuaia SHG te ten SARAS Fair & SHG Mela hi buatsaih leh a ni a, he hunah hian Stall 102 bakah Food Stall 8 buatsaih a ni a. Heng zingah hian MzSRLM hnuaia Block 28 chhunga khaw 71 atangin SHG member 98 ten Stall 52 leh Food Stall 2 an nei thei a ni.

He huna tarlan a nih danin Mizoram District 11-a RD Block 28 chhunga khaw 721-ah SHG hi 11,257 din a ni tawh a, Member 81,030 an awm a, NULM hnuaiah SHG 1,532 an awm mek bawk a ni.