Mizoram-a Territorial Army (Home & Hearth)-a tang turte lakna Nov. 15, 2025 atangin neih a ni dawn

Mizoram-ah a hmasa ber atan Territorial Army (Home & Hearth)-a tang turte lakna chu thla thar November 15 atanga 25 chhung khian Aizawl Mualpui Salem Veng-a Rajiv Gandhi Stadium-ah neih a ni dawn a, a vawikhatna atan hmeichhia-te tan Territorial Army (Home & Hearth)-ah hian luh theih a ni dawn a ni.

State Level Committee on Territorial Army Coordination and Establishment-a Chairman Lt. Col. Clement Lalhmingthanga MLA chuan nimin khan Aizawl Khatla-a PHQ Conference Hall-ah thuthar thehdarhtute kawmin Territorial Army (Home & Hearth)-a tang turte lakna neih tur chungchang hi a sawifiah a. He hna lakna hi Mizoram Sawrkar leh 166 INF BN (TA) (H&H) Assam-te tangkawp chuan an buaipui dawn thu sawiin, langtlang tak leh mumal taka Territorial Army-a tang turte lak an nihna tur hian Mizoram Sawrkar hnuaia Home Department, Health Department, DIPR leh District thuneitute chuan thahnemngai takin hma an la ho tih a sawi a. “A vawikhatna leh a hmasa ber atan Mizo nula te Territorial Army-a an luh theihna tur kawng hawn a ni a. India Sawrkar chuan hmechhiate Armed Forces-a luhna tura hmalakna kalzelah tun tuma Territorial Army lak turah pawh hian General Duty-a post 144 lak turah post 9 chu hmechhiate tana hauhsak a ni a. Hetianga hmeichhiate Territorial Army-a an luhna tur atana bultanna hian hmeichhiate ram tana hna an thawhna te, mahni an inthununna te leh hruaitu nihna thinlung an neih te lanchhuahtirna tura ruahman a nih bakah Mizote kan khawtlanga hmeichhia dinhmun pawihmawhna leh hnam inlungrualna leh chakna atana hmeichhiate hnathawh lantirna tur atana ruahman a ni,” a ti bawk.

Lt. Col. Clement Lalhmingthanga chuan he hna lak tur hi Mizoram tana Mellung pawimawh tak a ni tih pawh sawiin, Mizo thalai hmeichhia leh mipa te chu ram leilung fa an nih anga mahni ram tana thawk a, venghim tura atana ke an pen ve theihna tur kawng hawnsak chu a tum ber pakhat a nih thu a sawi a. Territorial Army atana lakte chuan Indian Army Uniform nen chhuanawm taka ram tana hnathawkin, Indian Army te angin hlawh leh hamthatna bakah damdawi-a inenkawlna an dawn thu leh an hnathawh that dan leh mawmawh dan a zirin Territorial Army te chu hun rei zawk atana chhawr theih leh hamthatna hrang hrang Sawrkar ruahman anga pek zui zel tur an nih thu a sawi a. An hnathawh tur hun chhung thawk zo te chu Pension leh hamthatna hrang hrang an damchhungin an hlawh tawh dawn thu a sawi a ni.

Hei bakah hian Sawrkar Laipui chu 8th Central Pay Commission hmang turin a inbuatsaih mek thu pawh sawiin, hei hian Territorial Army te hlawh leh hatthatna pawh a belhchhah dawn thu a sawi a. Mizo thalai, hmeichhia leh mipa Territorial Army dil thei zawng zawng te chu hun tha bawhpelh lo tura chahin, Mizo Territorial Army Companies chu Aizawl-ah din a nih twh thu a sawi bawk a ni.