Kolasib District-a Taxation hmunhma te tlawh

Minister Dr. Vanlalthlana chuan nimin khan Kolasib District-a Taxation Office leh Checkgate te a tlawh.

Minister Dr. Vanlalthlana hian Kolasib-a Deputy Commissioner of State Tax, Kolasib Zone Office chu tlawhin thawktute a kawm a, theihtawp an chhuah tlan chuan Tax revenue tun aia tam an hmuh theih ngei a beisei thu a sawi a. Taxation Office-a thawktute hian Minister hnenah hian Kolasib Zone-a an hmalakna hrang hrangte lo hrilhin, Kolasib hnaih ah Tax Inspection point awm thei se an duh thu leh an mamawh dangte an thlen a ni.

Hemi hnu hian Vairengte a Taxation Data Collection Centre tlawhin a kal chhan ber chu an harsatna neih te a hmun ngeia enfiahpui leh an hmunhma te a hmuna tlawh a nih thu a sawi a. Tax luh that tawk loh chhan zinga langsar zual te tarlangin, “Tax pumpelhna chi hrang hrang - Vairam atanga thil lei, Mizorama rawn hralh leh si, amaherawhchu vairam a Tax pe si te, Mizorama thil hralh, Mizorama hralh ang ni lova ziah te leh tax pumpelhna kawng tam tak a awm thin a ni,” a ti a. Hemi piah lamah hian engtiangin nge tun aia chak zawk leh tam zawka Tax collection tihpun a nih theih ang tih chu a ngaih pawimawh a nih thu a sawi bawk.

Education changtu Minister ni bawk Dr. Vanlalthlana hian Vairengte-a School pali tlawhin an mamawh leh harsatna te an lo thlen bawk a ni.