Sazu puang in chhungkaw 4,756 te thlawhhma a tichhe tawh

Rawthing Tam avanga Sazu puangin Mizoram hmun hrang hrang thlawhhma a tihchhiat sak kuthnathawktu chhungkaw 4,756 zet an tling tawh.

Agriculture & Farmers' Welfare Department hotute sawi danin 'Thingtam' ti a vuah, Rawthing tam avanga chhungkaw 4,756-te hi Mizoram District 11-a khaw 150 a chengte an ni a. Khaw 150 a thlawhhma lakna ram zau zawng hi hectare 6,938.154 zet a tling a. Sazu puangin a tihchhiat thlawhhma zau zawng hi hectare 1,988 chuang a tling tawh a ni. Sazu Tur kg. 186 chuang chu Department-in an sem chhuak tawh a. Sum indaihlohna avang leh Fur a nat em avanga tlawhpawh theih loh khua, Sazu Tur sem theih lohna a awm nual bawk. Agriculture & Farmers' Welfare Department hotute chuan loh theih loh avanga Sazu hi Tur-a hrai a ngaih thu an sawi a. Chutih rualin a huhova Sazu hrai kalpui a tha ber tih sawiin, fimkhur erawh a ngai hle tih an sawi a, Sazu thite hi kutkawr bun chunga chhar khawma phum tur a nih thu an sawi bawk.

Rawthing tam avanga kuthnathawktute tawrhna leh hloh hi State Specific Disaster a puang turin Disaster Management & Rehabilitation-ah ngen mek a ni a, hetianga puan theih a nih chuan Rawthing tamin a hrin Sazu puang avanga an buh leh bal leh thlai tam tak chantute hi zangnadawmna pek theih a beiseiawm thu Agriculture & Farmers' Welfare department hotute chuan an sawi a ni.