Mizoram-a Sazu puang tuartu an pung chho zel

Rawthing tam avanga Sazu puangin an thlawhhma a tihchhiatsak kuthnathawktu chhungkaw 5622 an tling tawh.

Agriculture & Farmers' Welfare Department hotute sawi danin 'Thingtam' ti a vuah, Rawtthing tam avanga chhungkaw 5622-te hi Mizoram District 11 a khaw 170 a chengte an ni a. Khaw 170 a thlawhhma lakna ram zau zawng hi hectare 7634.754 zet a tling a. Sazu puangin a tihchhiat thlawhhma zau zawng hi hectare 2331.154 chuang a tling tawh a. Sazu Tur kg. 187 chuang sem tawhin sum indaihlohna avang leh Fur a nat em avanga tlawhpawh theih loh khua, Sazu Tur sem theih lohna a awm nual bawk. Agriculture & Farmers' Welfare Department hotute chuan loh theih loh avanga Sazu hi tura hrai a ngaih thu an sawi a, chutih rualin a huhova Sazu hrai kalpui a tha ber tih an sawi.

Rawthing tam avanga kuthnathawktute tawrhna leh hloh hi State Specific Disaster a puang turin Disaster Management & Rehabilitation-ah ngen mek a ni a, Rawthing tamin a hrin Sazu puang avanga an buh leh bal leh thlai tam tak chantute hi zangnadawmna pek theih a beiseiawm thu Agriculture & Farmers' Welfare Department hotute chuan an sawi a ni.