‘Operation Jericho’ kalpui hnuah Heroin lut tlemin a rawn lut erawh a man a to thung

Mizoram sawrkarin September 1, 2025 atanga ruihhlo do beihpui, ‘Operation Jericho’ a kalpui hnuah Mizoram-a Heroin lut a tlem nia hriat niin a man erawh a san phah thung nia hriat a ni.

Zalen-in Excise & Narcotics Department (END) thawktute hnen atanga thu a dawn danin Operation Jericho hi Mizoram Police, END, Central YMA bakah ramri dep khuate nen kalpui a ni a. Ramri lamah Police insem darhin a tul angin hma an la a, District khawpui lamah Excise & Narcotics Department-in hma an la thung niin an sawi a. September 1, 2025 atanga Mizoram pumah ruihhlo do beihpui, ‘Operation Jericho’ kalpui tan atanga October 23, 2025 thleng khan END chuan Heroin kg 3.889, Ganja kg 28.779 leh Methamphatamine kg 53.008 an man tawh a. “Ni danga a hlawm lian pui pui lo lut thin ang kha chu a tlem a; mahse, a neuh neuh erawh a lut ve reng thung a. Heroin bakah hian Shillong lam atangin Mizo thenkhatin Ganja an rawn thawnlut thin bawk,”an ti a. Ruihhlo luhna ber, Myanmar nen ramri-ah luhna khân a tam em avangin dan sen a ni lo tih sawiin, “Ruihhlo tawlhtute hi an fing­in kan lirthei hmante an hre zung zung a. A chang leh check gate-te ke-in an hel a, Fur lai pawhin Tiau hi hleuh kaiin Mizoram-ah ruihhlo hi an rawn tawlh tho a, a buaithlak khawp mai,” aan ti bawk.

Ruihhlo chu tunhma chuan Champhai District lamah deuh chauh a lut thin a, tunah erawh Myanmar ramri hmun tin atangin a lut niin END-a thawktute chuan an sawi a. “Myanmar nena kan ramri-ah hian inkalpawhna tur khân hrang hrang hi a tamin ven sen a ni lo a. Ramri dep remchang lai apiang hi ruihhlo tawlhna atan an hmang nen ven hneh a har khawp mai. Hmun hrang hrang­ah mi tlawmngaite nen duty hi kan kalpui thin a. Ei leh in tur leh thil dang mamawh neuh neuh pek a ngai ve thin a, sum kan neih thin loh avangin harsatna neuh neuh hi kan nei a. Chutih rual erawh chuan tlawmngaia duty-te inpekna leh thawhrimna erawh a ropui kan ti hle a ni,” an ti bawk.

Ruihhlo chi khat Methamphetamine chu engemaw zat man thin ni mah se Mizo zingah chuan ruihpui an la tlem nia an hriat thu END thawkte chuan an sawi bawk a. “Tunhnai ah erawh thalai zingah ti an awm em aw? kan ti a. Mahse, ti erawh an awm pawhin tlem te chauh an nih kan ring,” an ti a. Mizoram-a ruihhlo man a tam chhan ber chu a kalkawng bera hman thin, Manipur buai vanga a tawlhtute an insawn vang tih an sawi bawk.

Hetihlai hian damdawi hmang thin mi thenkhat te chuan Heroin chu hmuh tur a la awm reng niin an sawi a. Ruihhlo chu awm reng mah se sawrkar hmalakna vangin a vâng a, a man pawh a to phah tih an sawi a. A hma lama Heroin tictac bur khat Rs. 1,500/1,600 vel ni thin chu Rs. 2,500 a kai tawh niin an sawi bawk a ni.