India ram intodelh leh hmasawn 'Vikshit Bharat' siam turin lungrual taka kan thawhho tlan a tul

Mizoram Larsap General (Dr) Vijay Kumar Singh chuan India ram intodelh leh hmasawn 'Vikshit Bharat' siam turin lungrual taka kan thawhho tlan a tul thu a sawi.

Nimin khan 'Ek Bharat Shreshtha Bharat' hmalakna hnuaiah Jammu and Kashmir, Ladakh, Andra Pradesh, Andaman and Nicobar Islands, Chandigarh leh Chhattisgarh-te dinchamphahak 'Foundation Day' lawmna chu Aizawl-a Raj Bhavan Durbar Hall-ah neih a ni a, he hunah hian Larsap chuan India ram inpumkhatna atana Prime Minister hmalaknaa programme pawimawh tak 'Ek Bharat Shreshtha Bharat' hmangin India ram khawi hmunah pawh hnam ziarang leh nunphungte inpawh tlang taka pholanna 'Mini India' siam thin a nih thu a sawi a. Foundation Day lawm sak State leh Union Territory-te chanchin tlangpui tarlangin, Mizoram ang bawka hmun mawi leh ami chengte pawh mi tha tak tak an nih thu a sawi a. India ram anga hnam ziarang leh nunphung danglam nasa ram a awm chuan loh thu leh State/UT tinin hnam ziarang leh tihdan phung hran theuh an neih thu sawiin, India ram intodelh leh hmasawn 'Vikshit Bharat' siam turin lungrual taka kan thawhho tlan a tul a ni, a ti a. He huna kalkhawmte chu State dangte hnam ziarang, nunphung, tawng leh inkaihhruainate hriatchian lehzual tum turin a chah bawk.

Jammu and Kashmir leh Ladakh-te hi October ni 31, 2019 khan Union Territory-a puan an ni a. November ni 1, 1956 khan Andra Pradesh chu tawng behchhana State siam hmasak ber niin, hemi ni vek hian Andaman & Nicobar Islands chu Union Territory atan puan a ni a. November ni 1, 1966 khan Chandigarh chu Union Territory-ah siam niin, Chhatisgarh chu November ni 1, 2000 khan State-ah hlankai a ni bawk.

'Ek Bharat Shreshtha Bharat' programme hian India rama State leh UT hnuaia cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh inhriatthiamtawnna nasa zawk siam a tum a. He programme kaltlang hian India rama State leh UT hrang hrangte dinchamphaphak Foundation Day lawmna chu Raj Bhavan, Mizoram-ah Governor kaihhruaiin June, 2023 atang khan buatsaih tan a ni a. Nimin-a hun hman hi APS to Governor Lalhruaitluangi chuan kaihruaiin heng State leh UT te chanchin hi ngaihthlak a ni a, Governor leh Lady Governor te'n hemi puala kalkhawmte hi Upper Lawn, Raj Bhavan-ah kawmin hun hlimawm tak an hmang ho a ni.