Tlawng leh Chhimtuipui IWT hmalakna tifel tep

Sawrkar laipui-a Ministry of Ports, Shipping & Waterways changtu Union Minister Sarbananda Sonowal chuan ramchhunga luidung a inkalpawhna tih hmasawn nan Tlawng lui leh Chhimtuipui hmasawnna tur project chu IWT hmalakna hnuaiah tihfel tep a ni tawh tih a sawi.

‘India Maritime Week 2025’ puala thuchah a sawi ah he thu hi sawiin Union Minister Sarbananda Sonowal chuan ramchhunga inkalpawhna tih hmasawnna tur zingah Mizoram chu a tel ve tih sawiin, Tlawng lui leh Chhimtuipui lui hmasawnna tur chuan Khawthlangtuipui leh Tuichawng te chu kawtchhuahah siamin hei hian hmasawnna lian tak a thlen dawn tih a sawi a, hmarchhak bial dangah pawh an lui tui tih hmasawnna tur hrang hrang hna chak taka thawh chhoh mek a nih thu a sawi.

Union Minister chuan ramchhunga Lui hrang hranga Lawng lian kalkawng tur tih hmasawn kawngah sawrkar chuan theihtawpin hma a la tih sawiin Brahmaputra, Barak, Dhansiri leh Kopili te chu a hmingthang zual a nih thu leh heng lui kalkawng tih hmasawnna hian ramchhunga cheng te eizawnna a pek bakah ramin nasa takin hma a sawn phah dawn tih a sawi a, khualzin hip kawngah leh sumdawnna kawngah pawh hmasawnna tam tak a thlen dawn tih a sawi bawk.

Luidung tih hmasawn bakah hian lui leh a chhehvela awm te chu khualzinte mit fukna a nih theih nan cheimawi a nih tur thu Minister chuan sawiin, Mizoram-a Tlawng lui leh Chhimtuipui hmasawnna tur project pawh DPR enfel mek a ni tih a sawi a, hei hian ram chhunga inkalpawhna turah leh ramdang pawhna kawngah pawh hmun pawimawh tak a chang dawn tih sawiin, sawrkar chuan hmarchhak bial a dah pawimawh thin tih a sawi a, hmasawnna hrang hrang hnathawh chu ramchhung hmun dang rualin hmarchhak Bial in Prime Minister Narendra Modi kaihhruai sawrkar hnuaiah a hmu thin tih a sawi bawk.