Hnahsin Kut-a sum che tam

Champhai-a Hnahsin Kut hman zawh takah khan Champhai leh a chhehvel bawra sum che vel leh sum lut chu cheng nuai 1,500 (vbc. 15) vel nia chhut a ni.

Hnahsin Kut Organising Committee ten an sawi danin Hnahsin Kût event tan hma September thla tawp atangin Hnahsin hmun tlawhtu khawtual mi leh khualzin thahnem tak an awm tan a, chutiang zawng zawng nena chhutin Hnahsin Kût chhimtu/tlawhtu (footfall) chu mi 1,20,000 vel anga chhut a ni tih an sawi a, Champhai-a Hotel, Guest House leh Homestay te sum lakluh belhkhawm chu cheng nuai 140 vel a nih thu leh khualzin an thlen zat belhkhawm chu a neitu ten an chhan danin Mizoram chhung mi 5,100; Mizoram pawn mi 805 leh India ram pawn mi 56 an ni tih an sawi a. hemi let tam tak hi mahni chhung te, thiante leh thawhpui te hnena thleng an ni tih an sawi.

Hnahsin Kut Organising Committee chuan Hnahsin Kut tawp zan-a Mualnuam Concert chu mi 42,000 velin an chhim nia chhut a nih thu sawiin, Hnahsin Kut neihna hmuna dawr neitute inhralhna belhkhawm chu cheng nuai 200 vel a ni tih an sawi a, Taxi (Four Wheeler leh Two Wheeler) te, Motor sil te, Restaurant te, a hmun pawna kawng sir leh mahni compound chhunga thil lo zuar te, Champhai Bazar te, Aizawl to Champhai kawnga Hotel/Restaurant-te leh nepnawi zuar te. Zokhawthar leh a chhehvela lirthei leh sumdawng te inhralhna zawng zawng pawh cheng nuai za tam tak a ni tih an sawi a. Heng te nen hian Hnahsin Kût vanga sum che vel leh sum lut chu cheng nuai 1,500 (vbc. 15) vel nia chhut a nih thu an sawi a ni.

Hnahsin Kût buatsaih chhan ber pakhat chu Champhai leh a chhehvelah khualzin ten sum thahnem tak an thlauh a, khawtual mi ten a zar an lo zo a nih thu Hnahsin Kut Organising Committee chuan sawiin, “Hemi kawngah hian kumin Hnahsin Kût hi a hlawhtling thawkhat niin kan hria,” an ti bawk.