Nikum aiin kumin ah ruihhlo vanga thi an tam tawh zawk

Kumin (2025)-ah January thla atanga October 16 thleng khan Mizoram-ah ruihhlo vanga nunna chan mi 70 chuang an awm tawh a, nikum kumtluan-a ruihhlo vanga nunna chan aiin an tam tawh zawk a ni.

Mizoram sawrkar-a Excise & Narcotics Department (END) chhinchhiah danin, kumin (2025) hian October ni 16 thleng khan Mizoram-ah mi 73-in ruihhlo vangin nunna an chan tawh a, nunna chante hi mipa 61 leh hmeichhia 12 an ni. Nikum (2024) chhung khan Mizoram-ah ruihhlo vanga thi mi 67 an awm a, heng te hi mipa 58 leh hmeichhia pakua an ni a. Nikum aiin kumin hian ruihhlo vanga thi hi mipa leh hmeichhia-ah an tam tawh ve ve a, kum 2024-a ruihhlo vanga thi te hi kum 19 leh kum 52 inkar an ni a, kumina mite hi kum 19 leh kum 57 inkar an ni.

Kumin a ruihhlo vanga nunna chan mi 73-te zinga mi 27-te chu Heroin vanga thi an ni a, mi dang 43-te chu Heroin leh damdawi ruihhlo chi dang vanga thi niin midang pakhat chu Alprazolam vanga vanduai niin pakhat erawh eng ruihhlo ber nge hriat loh a ni a. Chhinchhiahna atanga a lan danin tunhnai kum thum velah ruihhlo vanga thi hi a tam a, kum 2022-a nunna chan zat mi 43 a nih laiin kum 2023-ah 76-ah an pung a, kum 2024-ah mi 67 an ni a, kuminah thla 10 tling lovah mi 73 an ni.

Excise & Narcotics Department hian 1984-ah ruihhlo vanga nunna chan hi an chhinchhiah tan a, kum 1984 atanga kumin October ni 16 thlengin mipa 1714 leh hmeichhia 238, an vaiin mi 1952-in ruihhlo vangin nunna an chan tawh a ni.