Lirthei-a eizawng pawl hrang hrang ten sawrkar-a an lungawi lohna thu an puang

Kolasib-a Lirtheia eizawng pawl hrang hrang Joint Action Committee chuan Mizoram sawrkarin Petrol leh Diesel man a kawng siamna tur Chhiah an lak chu State Highway chauh a hman a nih tur thu PWD Minister in a lo hrilh tawh a, hei hi an chhawr ve loh avangin a man hmasa anga Petrol leh Diesel man tihniam turin thuneitute hnenah an lo thlen tawh tih an sawi.

Nimin khan Kolasib District Hqrs. Mizoram Tipper Association, Joint Action Committee leh Cachar Drivers Union hruaitute chuan Kolasib Press Club-ah thuthar thehdarhtute kawmin JAC Vice Chairman H. Lalchhanchhuaha chuan National Highway kawngpui te a that theihna tura an hmalakna kal mek chu tihtawp rih a nih thu a sawi a, tun tuma Road Block an huaihawt chu an tawpna tur a nih loh thu leh sawrkar lam hotute leh NHIDCL ten kawngpui siam hun tur an tiam ang te JAC in a enzui reng dawn tih a sawi a. Kolasib District chhunga kawngpui pawimawh hrang hrang Bairabi to Kolasib, Vairengte to Kolasib leh Serkhan to Bagha Road te an siam dan an vil reng dawn tih sawiin, an duh khawp a thleng lo a nih chuan theihtawp in hma an lak zui tur thu a sawi a ni.

H. Lalchhanchhuaha chuan kawngpui tha neih duh avanga tun thla ni 23-a Road block an neih ah an thawhpui mi 25 lai Police-in man in Lock-up ah dah an nih thu a sawi a. Road Block an tihtawp chhan pawh an thawhpui ten Lock up hial an luh avang leh heng an mi leh sa an man te hi case rit tak leh bail theih loh sawrkar in awrh tir an tum vang a nih thu a sawi a. Cachar District Drivers Union pawhin Mizoram kawng chhia an vei thu leh niminpiah mai ah Guwahati lam Driver pakhat chu kawng chhia avanga harsatna thleng vangin nunna hlu tak a chan thu a sawi a, Construction Company ten kawng siam tur hian Working Season-ah pawh thawh tum lovin chhuanlam an lo siam tawh thin tih sawiin, an siam dawn ti reng chung siin an siam mumal ngai lo a, hei hi mi an ngaihnep vang nia a lan thu a sawi bawk.

He hunah hian Cachar Drivers Union hruaitute pawhin MTA leh JAC ten kawng tha duh vanga Road Block an neih chu an thlawp tih an sawi a, niminpiah thleng khan Assam lam atanga Mizoram pan tur lirthei lian te pawh an la din tir tih an sawi a. Kawng chhia avangin lirthei tlan dan turah Mizo driver te nen an in ti buai a, kut pawh an inthlak, mahse, an in ngaidam leh thin a. Chutiang ni lo a anmahni venghimtu tur Police lamin kawng chhia vanga lirthei an din buai karah hnamdang driver te an hlap vak zel chu tawp tawh se an ti bawk. Cachar Drivers Union hruaitute chuan Vairengte Police checkgate-a an chawi tur pawisa an chawi hnuah Trade and Commerce Checkgate leh Taxation Checkgate-a pawisa tam tak an chawi tir leh thin tih he hunah hian an sawi bawk a, hei hi tihtawp dan awm se an duh tih an sawi a. Hei bakah hian Police Uniform ha zurui ten pawisa an dil nasa thin hle niin an sawi bawk.