Green Climate Fund sawiho

I&PR Minister B.Lalchhanzova hoin Inrinni khan Kolkata Mizoram House, Salt Lake-ah Mizoram in UNDP hnuaia Green Climate Fund a hman tangkai ve theih dan tur sawiho a ni a. He sawihonaah hian Ministry of Finance a Principal Economic Adviser hlui Climate Scientist Dr. Dipak Das Gupta leh Joy Chakravarty te an tel a. Dr. Dipak Das Gupta chuan India hmarchhak ah sik leh sa inthlak chuan nghawng a neih len thu sawiin, hemi kawnga hma la tura Mizoram sawrkar in bul a tan chu lawmawm a tih thu sawi a. Thing-tlang loneih hlawk tawh lo chungchang te, sik leh sa inthlak avanga eizawnna danglam mek te, Sawhthing chin eizawnna te leh Mizoram State chungchang thil hrang hrang an sawi ho bawk. Hei bakah hian Climate Finance hnuaia Mizoram tana hmalak theihna kawng te chak zawk dap chhoh dan tur zawn a tul zia sawi a ni a. Hemi ti chak tur hian Mizoram sawrkara department hrang hrang te bakah Financial Institution, zirna In leh khawtlang te tanrual a tul thu tarlan a ni bawk.