MNF Party hian kan ram felna tur ni lo, kan buaina tur an buaipui char char - Chief Minister

Chief Minister Lalduhoma chuan MNF party chu kan ram felna tur ni lo, kan buaina tur buaipui char char ah puhin, Total Bandh te hial siam an tum chu thil nuihzatthlak tak a nih thu a sawi bawk.

Dampa Bial-a Assembly by-election neih tura Dampa East Block Campaign hawnna nimin-a Reiek Community Hall-a neih a hmanpuina ah Chief Minister Lalduhoma chuan Congress sawrkarin Forest Rights Act (FRA) an lo pawm tawh leh kalpui tawh chu kum 2019 khan MNF Ministry chuan an paih thu sawiin, “He Act pawimawh tak mai hi kan sawrkar hnuah nikum khan kan tinung leh ta a ni,” a ti a. “He Act hnuaiah hian mipuite leh kan ram a him dawn a, chutiang chiah chuan FCAA pawh ram neitu leh ram a him zawkna tur a ni. MNF party hian kan ram felna tur ni lo, kan buaina tur an buaipui char char a, Total Bandh te hial siam an tum hi thil nuihzatthlak tak a ni,” a ti bawk.

Dampa Bial chu MNF leh Congress-ten kum tam tak an lo in enkawl chhawk tawh Bial a nih thu pawh Chief Minister chuan sawiin, “Mamit District pawh dawmkan ngai, India rama District hnufual ber zinga mi a ni mek hi kan vei a, kan sawrkar chuan dawmkan tumin theihtawp a chhuah mek a ni,” a ti a. Handholding Policy atangin Hmunphiah leh thildang dang dahthatna tur Warehouse 8 an siam thu leh Zau hrang hrang pawh tur Link Road an laih thu a sawi a. “Rubber Mission pawh thuang thumin kalpui a ni a, khaw hrang hrangah hmalak niin a cheibawlna tur nen cheng nuai 3394 zet hmalakna kalpui mek a ni. Khaw 14-ah tui connection pek a ni tawh a, tui harsatna khuaah tuizem pek zel tura ruahman fel tawh a ni,” tiin Dampa Bial-ah tui harsatna sukiang turin cheng vbc. 700 chuang ruahman fel a nih thu leh a putilin hunah chuan mipuiten hnianghnar takin tui an hmang thei tawh ang tih a sawi a. He Bial-ah hian Mizorama la awm ngai lo Incubation Centre dah a nih dawn thu pawh sawiin, thalaite pual tur he hmun atan hian cheng vbc. 35 chu a thawh khat nan pawisa an dah thu te pawh a sawi bawk.

Nimin-a Campaign hawnna hunah hian Dampa Bial-a ZPM Candidate tur Vanlalsailova pawhin Mizoram-ah sawrkarna chelhtu an nih avangin tumahin opposition MLA neih an duh a rin loh thu leh chu chu an MLA boral ta pawhin a duhthusam a nih thu a sawi a, Bial mipuite pawhin an tih hlawhtlin a rin thu a sawi bawk a ni.