Lehkhabu sem tur vailiam

Lunglei District Deputy Commissioner (Bawrhsap) bultuma Book Nest Initiative hnuaia Lungsen Aspirational Block-a zirlaite hnena sem tur zirlaibu, thawnthubu leh lehkhabu khawnkhawm te chu nimin khan Lungsen Block chhunga School hrang hranga sem turin Lunglei Bawrhsap Pisa tual atanga vailiam a ni.

Book Nest Initiative hnuaiah hian Lunglei Sub-Headquarters YMA hnuaia Lunglei khawpui chhung YMA Branch 19 te'n lehkhabu 11,034 khawn khawmin Lungsen a YMA Branch 3 atangin lehkhabu 22, UD&PA atangin lehkhabu 312 leh AstroScape neitu, Aryan Mishra hnen atangin lehkhabu 106 dawn niin a vaiin lehkhabu 11,474 khawnkhawm a ni a. Heng te hi nimin khan sem tura vailiam niin Lehkhabu thawnchhuahte hi Lungsen Block-a sikul hrang hrang 61 (Primary School 27, Middle School 27, Comprehensive School 3, High School 3 leh Higher Secondary Cchool 1)-ah te sem darh a ni dawn a. Heng School-ah te hian lehkhabu chhuar (bookshelf) pawh siam vek niin zirlaite'n heng lehkhabute hi tangkai taka an hman theih nan ruahmanna siam a ni bawk.

Nimin-a lehkhabu vailiamna hunah hian Lunglei Bawrhsap Navneet Mann-i chuan DC Office, Education Department, UD&PA Department, NULM/Self Help Group (SHG), Young Mizo Association (YMA) Sub-Hqrs. leh Branch te nen tangho a hlawhtling taka lehkhabu khawn khawm a ni leh thawnchhuah tura peihfel a ni chu lawmawm a tih thu a sawi a. Book Nest Initiative chu NITI Aayog hnuaia Aspirational Block Programme hmalakna leh Nasha Mukt Bharat Abhiyaan hnuaia ruihhlo do beihpui thlak tihhlawhtlinna pakhat a nih thu sawiin, thalaite'n ram hmelma ruihhlo buaipui lova zirna leh nunphung hrisel an um zawk theih nana zirtir te chu Book Nest Initiative-in a tum a nih thu a sawi a, hemi atana tawiawmna an dawng tha chu lawmawm a tih thu a sawi bawk.