Ram pass 138 te cancel sak

Lai Autonomous District Council (LADC) Sawrkar chuan Kaladan Multi Modal Transit Transport Project (KMMTTP) kawngpui sial in a tihchhiat nia insawi ram neitu 138 te ram Pass chu tunkar Nilaini khan a cancel.

Special Judge, Prevention of Corruption in thutlukna a siam bawhzuia KMMTTP-a ram pass neitu 138 te ram cancel-na hi LADC Senior Revenue & Settlement Officer in a tichhuak a. Kum tam tak chhung Lawngtlai District Land Owners Association chuan KMMTTP kawngpui sialin an ram a tichhia nia sawiin, zangnadawmna pek an lo ngiat tawh a, vawi tam tak helai kawng laih a nih lai pawhin hnathawktute an lo dang tawh a ni.

Kaladan Multi Modal Transit Transport kawngpui hi Lawngtlai atanga Myanmar ram pawh sial niin, Lawngtlai atanga Zochachhuah thleng, Kilometres 87 chu tangkai taka hman a ni tawh a, Myanmar ramchhung ah kawngpui sial hna hi thawh chhunzawm mek a ni.

Lawngtlai District Land Owners Association President T.Zatlunga chuan zawhna chhangin an ram pass cancel a nih chungchangah ram neitu intel-khawm, Lawngtlai District Land Owners Association chuan hmalakzui dan tur ngaihtuaha inhmuhkhawm thuai an tum thu a sawi.