Dampa Bial-a by-election chuh tur zingah INC Candidate a hausa ber

November ni 11,2025-a Dampa Bial by-election lo awm tura Candidate mi 5 zingah Indian National Congress (INC) Candidate John Rotluangliana a hausa ber a. Mizoram Peoples Conference party Candidate K. Zahmingthanga chu a rethei ber thung.

Dampa Bial Inthlan chuh tura hming pelutte chanchin kimchang (affidavit) atanga a lan danin INC Candidate John Rotluangliana s/o Israel Sangkhuma (L), Dawrpui Veng hian sumfai Rs. 4,00,000 bakah Bank hrang hrang, Saving leh lirthei bakah tlereuh a neih belhkhawm chu Rs. 1,29,12,502.18 a ni a. A nupui rohlu neih zawng zawng belhkhawm chu Rs. 7,64,811.91 a ni bawk.

Mizo National Front (MNF) Candidate Dr. R.Lalthangliana s/o Dengchhunga (L), Kanan Veng chuan sumfai Rs. 2,00,000 bakah Bank hrang hrang, Mutual Fund, lirthei bakah tlereuh a neih belhkhawm chu Rs. 99,35,189.25 a ni a. A nupui neih zawng zawng belhkhawm chu Rs. 1,31,34,097.89 a ni bawk.

Zoram Peoples Movement (ZPM) candidate Vanlalsailova s/o Khawvelthanga, Dawrpui Veng chuan sumfai Rs. 2,00,000 a neih bakah Bank hrang hrang, lirthei bakah tlereuh a neih belhkhawm chu Rs. 61,31,136.99 a ni a. A nupui rohlu neih zawng zawng belhkhawm chu Rs. 3,47,990 a ni bawk.

Bharatiya Janata Party (BJP) candidate Lalhmingthanga s/o Laldala, West Phaileng chuan sumfai Rs. 19,50,000 a neih bakah Bank hrang hrang leh lirthei nen a sum neih zawng zawng belhkhawm chu Rs. 25,65,662.58 a ni a. A nupui sum leh bank-a pawisa awm belhkhawm chu Rs. 5,87,740 a ni bawk.

Mizoram Peoples Conference (MPC) candidate K. Zahming-thanga s/o K.Tuahchhunga (L), Sakawrtuichhun hian sumfai kawl a nei lo a, Bank-ah Rs. 54,000 neiin a lirthei neih pakhat nen a thil neih neih zawng zawng belhkhawm chu Rs. 1,54,000 a ni bawk.

Dampa Bialtu MLA ni thin Lalrintluanga Sailo chu July ni 21, 2025-ah a boral avangin he bial ruak hnawhkhat tur hian November ni 11,2025-ah by-election hi neih a ni dawn a, November ni 14,2025-ah vote chhiar a ni ang.

Dampa Assembly By-Election atana Expenditure Observer Shyam Kumar, IDAS hovin Inrinni khan sum chingfeltute leh Candidate Agent-te chu Mamit DC Conference Hall-ah thukhawmin inthlanna felfai leh muanawm kalpui tura Account vawn dan dikte sawiho a ni a. Asst. Observer Jenny Thanhlupuii chuan Candidate-te Account vawn dan tur, felfai leh dik taka kalpui dan turah zirtirna a pe bawk a, he hunah hian Election buaipuitute leh Candidate te aiawh an tel a ni.