Crop Insurance kalpui a ni dawn tih sawi

Agriculture & Farmers Welfare Department changtu Minister PC. Vanlalruata chuan Mizoram-ah Crop Insurance an kalpui thei dawn tih a sawi.

ZPM Party in an party Office-a nimin-a Chhung Inkhawm an neih ah Minister PC. Vanlalruata chuan Mizoram-ah Crop Insurance an kalpui thei dawn tih sawiin, “Tuna kan Chief Minister ni mek Pu Lalduhoma hian hman atang tawhin kuthnathawktute hmakhua a ngaiin a vei em em a, a tlangau hla ber pawh Budget-a thlai thar leina dah leh Crop Insurance kalpui a ni a; tunah hian State Level Coordination Committee on Crop Insurance kan din tawh a, Tender te kan chhuah a, chutah chuan TATA AIG General Insurance Company Ltd. hi kan thlang fel tawh a, Mizoram-ah Crop Insurance kan kalpui thei dawn ta a ni,” a ti bawk.

ZPM ten an auhla ber ‘Thlai thar lei’ chu a takin an kalpui mek tih Agriculture Minister chuan sawiin, “Kumin ah Sawhthing rate a chhe em em a, Kg 1 Rs. 50-a hralh kha a huphurhawm hle a ni. Amaherawh chu, kan au hla a nih avangin tihhlawhtlin ngei tha kan ti a, kan Chief Minister hovin meeting kan nei a, kan intiam ang ngeiin tihhlawhtlin tha kan ti a, kuthnathawktuten an thawhrim rah an seng mek a, an lawm em em a ni,” a ti a. Tunhnaiah Sawhthing lei leh hralh chungchangah thil fel hlel a awm tih hriain sawrkar chuan a chhui chiang mek tih a sawi bawk.

FCAA chungchang pawh sawiin, “FCAA hi Central-a sawrkar mek NDA siam a ni a, chutih laia NDA thawhpuitu MNF ten an lo do ve chiam mai hi a mawi ber lo a ni. Mipuite tana harsatna thlen zawng leh mi eizawnna tibuai zawnga Total Bandh huaihawt an tum te hi kalphung hlui zia a ni,” tiin mipuite tana harsatna thlen zawng leh mi eizawnna nghawng zawnga sawrkar do chu ngaihtuah tha leh turin a chah bawk.