Pawisa chingpen chhui turin ti

Mizo Diaspora Cell, Chief Minister Office (CMO) chuan an thudawn bawhzuiin Singapore-a hnathawka awm Mizote pawisa tihchingpen sak thu hlaa hma la turin CID Special Branch te a hriattir a. Hemi chungchangah hian hmeichhe pakhat, Guwahati atanga Lengpui Airport-a rawn tum chu Thawhtanni kalta khan manin, thu zawhfiah atan hren zui a ni.

He hmeichhia hi Singapore-a hnathawk mek Mizo thahnem takten an pawisa Mizoram-a an chhungte thawnsak tura an rawih, an sum leh paite tihchingpensak zui leh ta si nia puh a ni a. Hnathawktu tam zawkte hian dan ang taka ramdanga pawisa thawnchhuah dan an hre bel lo a, hei vang hian thawn man tlawm zawka thawnsak thei anga a insawi bakah intiamkamna thlenga a neih ngam avangin mi tam takin a kutah an pawisa an dah ta tih CMO chuan an sawi a. An sum dah hi cheng nuai 300 vel nia hriat a ni. 

Thawhlehni kalta khan bum tuarte hian Mizo Diaspora Cell kaihhruaiin, Aizawl Police Station-ah FIR an thehlut a. He case hian thubuai ril zawk, ram chhunga dan phal loh a pawisa thleng kualna emaw, ramri kana dan phal loh bungraw lakluh leh chet velna thlenga nghawng a neih leh neih loh chhui nghal a ni. He thil thleng hian ram pawna hnathawka chhuakten an chhungte pawisa an thawnna lama fimkhur a tulzia a ti lang tih sawiin CMO chuan, dan ang taka thawn ngei chu a him ber a, dan lo a thawn theihnate chu tlawm zawk leh remchang zawk angin lang mah se a him lo tih a tifiah tih an sawi a. Sawrkar chuan dan ang taka pawisa thawnnaah chauh an thawhchhuah pawisate chu thawn zel turin an chah a ni.

Mizo Diaspora Cell chuan a din chhan ang ngeiin India ram chhung leh ram pawna cheng Mizote hamthatna a bei zel dawn tih sawiin, harsatna tawktute mamawh dan a zirin a kaihhnawih Department-te phungbawma sawmin, dan angin hma a laksak zel dawn tih an sawi a ni.