Zanin-ah YMA Inkhawmpui Lian tan a ni dawn

Mizoram-a tlawmngai pawl lian ber, Young Mizo Association (YMA) Inkhawmpui Lian vawi 75-na chu zanin hian Sakawrdai-ah neih tan a ni dawn a, he Inkhawmpui Lian-a tel tur Palai tam ber te chuan Vawiin hian Sakawrdai hi an pan ang.

Kum khat dan-a neih YMA Inkhawmpui Lian vawi 75-na hi Sakawrdai Playground-a Pandal sak, ‘Chengkawlawn Rûn’ ah neih tura ruahman niin zanin hian Palai Lawmna hun hman a ni anga, Bialtu MLA Lalchhandama Ralte chuan hmanpuiin Souvenir a tlangzarh anga, Report hrang hrang ngaihthlak a nih dawn bakah Lawmman thenkhat semin Hruaitu hlun chawimawina sem a ni ang.

Ruahman lawk ang chuan naktuk Nilaini-ah Khawmpui Palai ten Rorelin Palai ni lo tan Sakawrdai Community Hall-ah Variety Programme hman a ni anga, zan lamah Pandal-ah Vantlang Inkhawm neiin Chief Minister Lalduhoma chuan Khuallian niin a hmanpui anga, Central YMA General Secretary Prof. Malsawmliana hnen atangin Kumpuan thupui ngaihthlak a ni bawk anga, lawmman hrang hrang sem leh a nih dawn bakah Hruaitu hlun chawimawina sem leh a ni ang.

Ningani-ah kum 2025-2027 chhunga Central YMA hruaitu thlanna neih a ni anga, hemi rual hian Sakawrdai Community Hall-ah Variety Programme hman leh a ni anga, zan lamah Palai thlahna Inkhawm neiin he Inkhawmpui hi a tiak dawn a ni.

YMA INKHAWMPUI AGENDA:

A. YMA khawih :

1. YMA inkaihhruaina leh nihphung leh hruaitute mawhphurhna, rampumah inzirtirna neih ni rawh se.

2. Mizoram chhunga hnamdang sumdawng, phalna nei lo tam ta lutuk hi titlem turin YMA-in hma la rawh se.

3. Mizo hmeichhia ten hnamdang pasala an neih zel loh nan Central YMA hian inzirtirna nasa zawkin kalpui rawh se.

4. Mizo Infiamnate chawisan a nih theih nan CYMA-in hma la rawh se.

5. Zohnahthlak chi peng hrang hrangte Mizoram a chengte zingah chi bil hmalakna a awm tawh loh nan Central YMA-in hma la rawh se.

B. Sawrkar khawih :

1. Inner Line Permit (ILP) hi tun aia khauh leh awmze nei zawka kalpui a nih theih nan YMA-in Sawrkar-ah thlen rawh se.

2. Tui hnar humhalh dan siam ni rawh se. (The Mizoram Water Source Catchment Area Protection Act & Rules).

3. Mizoram chhunga inkalpawhna kawngpui hrang hrang a chhiat avanga mipuiten harsatna kan tawk nasa lutuk thin hi a lo ziaawm theih nan Mizoram Sawrkarin tun aia chak zawkin hma la rawh se.