Khaw 163 ten Thingtàm Sazu puang vangin harsatna an tawk

Thingtàm vangin Mizoram-a khaw 163-ah Sazu a puang tawh a, Sazu puang hian buh Tin 19,086 (hectare 7,634.754)-a zau lo/huan khawih tawhin, tin 5,835 (hectare 2,331) chuanga buh leh thlaite an tichhe vek a, Thingtàm vanga Sazu puang hi State-Specific Disaster-a puang turin sawrkarin hma a la mek a ni.

Agriculture & Farmers' Welfare Department hotute chuan, Thingtàm avangin Mizoram-a District tinah Sazu a puan thu sawiin, “Vawiin (October 27, 2025) thleng hian khaw 163-a loneitu chhungkaw 5,622-te thlawhhma hectare 7,634.754 (Tin 19,086.885 hmun)-a zauah Sazu an puang tawh. Sazu puang hian loneitute buh leh thlai an tichhe nasa a, hectare 2,331.154 (Tin 5,835.385 hmun)-a zaua mite phei chu loneitute'n an buh leh thlai zawng zawng an chán vek a ni,” an ti.

Agriculture Department hotute chuan, Sazute'n buh an khawih deuh ber thu leh Vaimim, Fû, Bê, Sawhthing, Bawkbawn, Hmarcha, Dawnfawh, Chhawhchhi, Fanghma leh Bean te pawh an ei chhiat nasat thu an sawi a. Sazu puang vanga harsatna tiziaawm turin sawrkarin theihtawp a chhuah thu sawiin, sawrkar hmalakna chu tha taka thlâwp turin mipui an ngen a, “Department lam chuan loneitute hnenah Sazu suat nan Tûr kan sem a, kg 186.67 kan sem chhuak tawh,” an ti a, hmun thenkhat ah Tur hmanga Sazu hrai beihpui thlak a ni tawh bawk a ni.

Agriculture & Farmers' Welfare Department chuan Sazu puang mek chu State Specific Disaster-a puan a nih theih nan hma an la a; State Specific Disaster-a puan a nih chuan Thingtàm vanga Sazu puangin buh leh thlai a tihchhiatsak loneitute tan zangnadawmna a awm theih beisei a ni.