MNF in sawrkar ngen leh

MNF party chuan FCAA pawmna Official Resolution hnuhkir a nih leh theih nan Special Assembly ko turin an ngen nawn leh.

Inrinni khan Aizawl Press Club-ah thuthar thehdarhtute kawmin MNF Legal Board Vice Chairman Lalpianfela Chawngthu chuan Chief Minister chu a Minister leh MLA-te ngei pawhin a thatna an sawipui thawm hriat tur awm miah lo, amah ngei pawhin ‘dan sakei’ tia a lo sawi thin, FCAA, 2023 Mizoram-a hman ve a duh leh tak thut chhan sawifiah tumna atan YMA inkhawmpui lian a hmang leh ram dang nena inrina atanga boruaka teha km 100 chin tih FCAA, 2023-a tarlan a nih laia km 10 chin chauh anga dawt chiang tak a sawi chu zahthlak a tih thu a sawi a. Hei bakah guidelines lo chhuakah ram venhimna changchawia central sawrkarin hma a lakna turah te ‘State sawrkar ah dil phawt tur a ni, state thuneihna a sang ta a ni’ tiin dawt bawk a sawi zawm leh tih sawiin, “Guidelines-ah hian State sawrkarah dil tur tih reng reng a awm lo a, thuneihna tawp chu Central sawrkar kutah zel dah a ni,” a ti.

MNF Legal Board hotute chuan, “FCAA duh lotute hmasawnna (develoment) duh ve lo hial anga inpuhna lek lek a awm mek a. Mizoramin FCAA kan pawm (adopt) hma hian tuna kan ram hmsawnna kan hmuh zawng zawng hi thawh a lo ni tawh a ni tih kan sawi nawn leh duh a. Kan ram leh hnam himna hralh kher lo pawh hian hmasawnna hna a thawh theih a ni tih hi lo hre nawn leh turin Zoram mipuite kan chah nawn leh a ni,” tiin FCAA dodalna atana MNF-in October 29, 2025-a Total Bandh a huaihawt tur chu kan ram leh hnam tan a ni tih hria a, thlawpa  tawiawm theuh turin an sawm tih a sawi a. Sawrkar pawh Total Bandh neih hma hun tlem te la awmah hian he dan, Assembly-in a lo pawm tawhna Official Resolution hnuh kir a nih leh theih nana Special Assembly kohna tichhuak turin an ngen nawn tih a sawi bawk.