Lawng tuk man sang ve zel

Lunglei District khawthlang lam-a awm Khawthlangtuipui kam-a khaw hrang hrangten inkalpawh nana tangkai taka an hman thin Lawngleng siam man chu hmanraw man to zel karah san lam a pan ve zel.

    Lawngleng hi tun dinhmuna Tlabung leh a chhehvel khua ten inkalpawhna atan an hman tlanglawn ber pakhat niin thil man to zel karah Lawngleng tuk man pawh a to chho ve zel a, Khaw-thlangtuipui-a Lawng tam ber siamna atan hian a tlangpuiin Lawngthing leh Thlanvawng kung hman a nih thin laiin, Zawngtawitaw leh Thlado thing hmanga tuk Lawng engemaw zat a awm bawk. Tun dinhmunah Lawng man hi a tuk thinte azirin inang diak diak lo mah se a tlangpuiin ft. 15-a sei, patling 4 atanga 6 vel chuan len theihna Lawng chu Rs. 12,000/- man vel a ni deuh ber a, a tuk thiamte chuan Lawng pakhat tuk zawh nan ni 3 chhung an hmang tlangpui bawk. Tunlai hian tui a nut avang leh Lenkhang zar ala hun loh avangin he lui behchhana eizawng, Sangha mantu then-khat te chuan an Lawng thawmthat hna an thawk mek bawk a, a tlangpuiin Lawng pawp lai, tui a luh thinna lai chu Beraw leh a bika siam lapua hmangin an char phui deuh ber a ni.