December-ah Scouts & Guides intawhkhawmna neih rel

Serchhip District-a Bharat Scouts & Guides intawhkhawmna, Grand Camp Fire chu kumin December ni 5 khian neih a ni dawn.

Serchhip District Bharat Scouts & Guides Council Meeting chu tunhnai khan an President leh Bawrhsap Paul L. Khuma hovin neih a ni a, he Meeting hian Serchhip District-a Bharat Scouts & Guides intawhkhawmna, Grand Camp Fire chu kumin December ni 5 zan-ah Serchhip Darnam Veng-a LM Comprehensive School-ah neih nise tiin Tritiya Sopan Camp pawh Serchhip District tan hemi kar vekah December ni 3 atanga tanin ni thum (3) chhung neih nise an ti bawk.

Hei bakah hian Faina Hnatlang neih chungchang pawh sawiho niin tualchhunga Scouts & Guides ten October 31-ah Serchhip khaw chhung tihfai hnatlang, Cleanliness Drive neih nise an ti a, Serchhip Indoor Stadium tualzawl-ah zing dar 7:00-ah a hawnna chu District President Paul L Khuma hovin neih a ni anga. Serchhip District chhung School hrang hrangah a remchan dan angin Scouts & Guides Unit thar din belh nise an ti bawk.

Serchhip District Bharat Scouts & Guides Chief Commissioner atan District Education Officer (DEO) JR. Lalhruaitluanga chu tunhnai khan lakluh niin SDEO Melody L Betlu pawh District Commissioner (G) atan lakluh a ni bawk.