Court in NH. 306 siamtute an hnathawh thehlut turin a hriattir

Gauhati High Court chuan NHIDCL hnuaia Kawnpui leh Sairang inkar National Highway 306 siamtu Contractor J. Infratech chu an hnathawh chin leh kawng an siam zawh theih hun tur October ni 31, 2025 ralhma a affidavit hmanga thehlut turin a hriattir.

Kawnpui leh Khamrang inkar NH-306 kawngpui chhia chungchangah hian Mizoram Truck Driver Association (MTDA) chuan Gauhati High Court Aizawl Bench-ah Public Interest Litigation (PIL) an thehlut a, PIL hi Judge pahnih thutna High Court Bench in Zirtawpni khan a ngaihtuah a. MTDA khinna chungchang ah hian Gauhati High Court chuan kawng enkawltu NHIDCL-in kawng siam tura hna a pek J. Infratech chu thubuaiah hian a hnûk lut (implead) a; hna an thawh tawh chin leh kawng an siam zawh theih hun tur October ni 31 hma ngeiin Court-ah affidavit hmanga thehlut turin a hriattir a. J. Infratech hian sawifiahna affidavit an thehluh loh chuan Court-ah NHIDCL hotute an inlan a tul dawn thu a tarlang a; thubuai ngaihtuah leh hun atan November ni 6, 2025 a ruat bawk.

Gauhati High Court Judge Justice Marly Vankung leh Justice Kaushik Goswami te thutna Bench chuan July ni 18 khan MTDA aiawha Jordan Rohmingthanga PIL thehluh chu a lo pawm tawh a. MTDA hian National Highway-306 leh 06 kawng chhe lutuk chungchangah hian Ministry of Road Transport & Highways, NHIDCL, Mizoram sawrkar leh PWD te a khing a. Helai kawngpui hi Mizoram chak lakna ber a nih thu leh Truck khalhtute chu kawng chhe tuartu ber an nih thu an tarlang a, Mizoram mipui mamawh chawkluhna ber kawngpui chhe lutuk chu Mizoram pumin an tawrh thu an tarlang bawk a ni.