Working Women Hostel sak tur lungphum phum

Chief Minister Lalduhoma chuan nimin khan Aizawl Khatla-a ‘Working Women Hostel’ sakna tur lungphum a phum.

Kumin-a Working Women Hostel sak thar tur pasarih zinga pakhat, Khatla-a Working Women Hostel sak tur lungphum phumna puala inkhawm I&PR Auditorium-a neih ah Chief Minister Lalduhoma chuan SASCI 2024-25 Part X- ah Central sawrkar chuan Working Women Hostel sakna tur a ruahman thu leh Mizoram in cheng vbc. 127 kan hmuh thu sawiin, Hostel pasarih sak an pawm tak thu a sawi a. “Vawiin-a a lung kan phum Khatla Working Women Hostel hi Mizo Hmeichhe Tangrual ten kum tam tak Women Hostel an lo kalpui tawhna hmun a ni a. An building a upain a thar an mamawh tih kan hria a. Mi tam zawk lenna neih a tul bawk si a. A thar saksak kan rel ta a ni,” a ti.

Chief Minister chuan 15th Finance Commission hun tawp lamah kan awm avangin kan Fund hmuhte hi hmanhmawh taka kalpui a tul thu sawiin, “Chuvang chuan SASCI hna thenkhat hi chu RTestricted Tender kalpui kan phalsak a ni,” a ti a. “Hmasawnna hna kan thawhte hi a hun taka zawh zel theih kan duh a, hna thawh tha kan duh a, revise ngai lova kal zel kan duh bawk a. Chutianga kan kal theih nan chuan sawrkar hmalakna viltu tur State Monitoring Committee kan din a. Anni hian kan Women Hostel sak mekte pawh hi a tul angin an rawn endik thin ang,” tiin kum tam tak Working Women Hostel an lo kalpui tawhna ah Hmeichhe Tangrual Pawlte hnenah lawmthu a hrilh a. Building thar chuan zau zawka rawngbawlna a hawnsak tur thu hrilhin, ram tana angkai taka hmang turin a chah bawk a ni.

Working Women Hostel hi Mizoram-in pariat (8) a nei mek a, a thar pasarih te hi peih an nih chuan 15 a awm tawh dawn a. Tuna a lungphum phum tak Mizo Hmeichhe Tangrualte enkawl Khatla Women Hostel hi kum 1975-a Social Welfare Board, Govt. of India atanga pawisa hmuh hmanga sak a ni a. A tirah mi 30 awm theihna niin a hnuah Central sawrkar vekin sum a rawn pek belh hmangin an tilian leh a, mi 60 khawsak theihna a lo ni ta a, a thar sak a nih dawn tak avangin building hlui hi thiah niin Sky Builders, Zemabawk North ten an sa dawn a ni.

Mizoram sawrkarin SASCI 2024-25 Part X atanga Working Women Hostel a sak turte hi cheng vbc. 29.72 senga mi 140 awm theihna tur nimin-a lungphum phum tak bakah mi 50 awm theihna tur cheng vbc. 14.01 sengin Ramhlun Sports Complex Hostel; Mi 50 bawk awm theihna tur cheng vbc. 18.18 sengin ITI Veng Hostel; Mi 120 awm theihna tur ZMC Working Women Hostel chu cheng vbc. 26.34 sengin; mi 50 ve ve awm theihna turin cheng vbc. 14.09 sengin Lunglei Ramthar Veng Hostel leh cheng vbc. 13.66 sengin Champhai Hostel bakah cheng vbc. 11 sengin mi 30 wm theihna tur Thenzawl Working Women Hostel te a ni.