REVENUE DEPARTMENT

REVENUE DEPARTMENT

- Eddy Zosangliana Colney

General Secretary (GAD)

ZPM Gen.Hqrs, Aizawl

Sawrkar hi mipuite ta, mipuite siam a ni a. Sawrkarin eng nge a tih tih hi a siamtu mipui ten hriat hi kan chanvo a ni. ZPM in sawrkarna a chan atangin kum khat leh thla riatna a kal mek a. Sawrkarna a chan hnuah hian eng nge a tih, engtiang chiahin nge hna a thawh tih te a theih ang angin, Department hrang hrangte a tahtawlin tarlan kan tum dawn a ni.

A hmasa ber atan Land Revenue & Settlement Department hi kan luhchilh ang a. ZPM in sawrkarna a chan hnua Department hmasawn nasa ber a chhiar ngam chu Land Revenue & Settlement Department hi a ni awm e. 

LR&S Department-ah hian Administrative Reform & Decentralization chak taka kalpui a ni a. Mawhphurhna hrang hrangte nasa taka siamremin, semzai a ni. Tun hma chuan Secretariat-in Directorate Level-a khawih awm tak hna engemawzat an khawih thin a. Directorate-in District Office khawih tur ngei ngei hna tam tak an khawih thin bawk. Aizawl District leh khawpui chhung bikah phei chuan Directorate kha Surveyor Officer (SO) Office lianpui ang maiin hna an thawk a ni. 

Hna chi hrang hrang an khawih pawlh thinte chu Settlement Office leh DC Level-ah te pek then mek an ni ta a, Revenue Director-in a tih tur diktak heng - hna thawh dan tur duan, SO te hnathawh dan vil, ram chhung hmun tlawhkual adt. te a takin a thawk chho tan mek a. Secretariat lam pawn Policy leh Programme tak tak an ngaihtuah theih nan tunah hian ruahmannate siam mek niin nakin lawkah chuan Secretariat leh Directorate thlen ngai lovin revenue hna tam zawk hi District leh Sub-Division-a chinfel theih a ni dawn a ni. DC-te hi Revenue Administration-ah mawhphurhna lian zawk pek zel tum an ni a. Hei hi India ram hmun tam zawka an kalphung a ni.

Revenue Minister ten thuneihna pumhmawma AMC area chhunga House Pass dilna form anmahni (Minister) 'recommend' loha lei theih loh tura an lo kalpui thin pawh ZPM sawrkar chuan January, 2024 atang khan a ti tawp nghal bawk.

Directorate-in Survey leh ram endik, LSC Issue leh Field Office-te thawh ang an thawh ve thin kha tihtawp niin, July 25, 2024 khan SO Aizawl North leh South-te siam niin (Geographical area base-a ramri thenin) hei hian mipuite tan nasa takin awlsamna a thlen a, Directorate Office chu Department hmasawnna tur leh District Office-te buaipui theihin a siam ta a ni.

SDO (Civil) te hi an nihna tur anga hman tangkai an ni lo nasa thin em em a. Mipuiin sawrkar awlsam zawka an ban theihna atan SDO Civil te hi Revenue Court-ah May 1, 2024 leh Sub-Registration Office-ah February 19, 2025-ah te puan an ni a. A taka hna an thawh theih nan hma lak mek niin, Thenzawl leh Vairengte Sub-Division-te hi Pilot atana thlan an ni a, ram thua buaina nei leh ram inlei leh hralh leh dahkhamahte SDO Civil-ah thil tam tak a tih theih tawh dawn a ni.

ZPM in sawrkarna a chan hnuah Settlement Office hmun pathum - Saitual, Khawzawl leh Hnahthial-ah te hawn belh tura hmalak nghal a ni a. July ni 8, 2025 khan Revenue Office Saitual hi hawn a ni a. Department leh DC Saitual te hmalaknain Saitual Revenue Office chu mipuite dawr theih turin a lo 'function' ta a, Khawzawl-ah hian August ni 13, 2025 khan SO Office hi hawn a ni ta bawk a, Hnahthial District-ah pawh hei hi tihhlawhtlin thuai tum a ni.

Hei bakah hian Survey hna outsource a ni ta bawk a. Surveyor indaihlohna avanga survey hnathawh muang lutuk phuhru turin survey hna chu November ni 8, 2024 atang khan firm sawmpathum (13) te chhawrin 'outsource' tan a ni. Hei bakah hian mimal Survey lama thiamna nei te license pein, Licensed Surveyor nei tura hmalak mek a ni bawk. Hei hian Department Surveyor-te kut chauha innghahna a tikiama, chak zawkin ram teh kawngah hmasawnna hmel thar kan hmuh theih phah dawn a ni.

Online hmanga tax pekna tih changtlung zel a ni a. Aizawl Municipal Area chauha pek theih thin kha tunah chuan Hnahthial District tih lohah chuan 'online' a ram chhiah hi pek theih vek a ni tawh a. Non-tax leh fees hrang hrang pawh SBI Main Branch a kal leh zel ngai lova SO Office-a pek theih turin District tin Office-ah bun fel a ni tawh bawk.

Record of Rights (ROR) kan neih zawng zawngte 'digitize' zawh vek tawh niin, tun hmaa Land record neih zat zawhna a awm apianga District Office-te leh Directorate-a an inchhiar mum mum thin leh 'figure' inang lo zung thin kha a awm tawh lo a. RoR kan neihzat hi awlsam taka hmehchhuah mai theih a ni tawh a ni.

Hun hmasa lamah khan Land Record Digitisation kalpui mumal a ni lo a, sawrkar thar a lo pian atangin chak taka hmalak a ni ta a. January ni 7, 2025 thleng khan RoR 361188 neih mek a ni. 

Survey of Villages and Mapping with Improvised technology in VIillage Areas Scheme (SVAMITVA) hnuaiah ram la theh lohna khaw 319-ah Drone Survey neih tawh niin Ground verification pawh zawh vek tawh a ni a. Property card (LSC tlukpui) pawh 2973 lai pek chhuah a ni tawh a. India ramah a ti tha ber pawl niin, Hmarchhak State dangte pawn Mizoram kalpui dan hi an rawn ngaihven thin a ni.

National Geospatial Knowledge Based Land Survey of Urban Habitation (NAKSHA) ah nasa taka hmalakna kalpui a ni a. He hmalakna hi kumkhat atana India sawrkar hmalakna niin India ram Khawpui Urban Local Bodies (ULB) thlan bik engemawzata Urban Land Record thuamchakin GIS I-integrated data base leh Land Ownership Transparency lam hawi project niin, Aizawl South atan bik AMC Ward XI  & XIX, Locality pali-ah kal pui mek a ni a, Aerial Survey tih zawh tawh a ni. He hmalakna hi Department of Land Record (DoLR) in Digital India Land Record Modernisation Programme (DILRMP) hnuaia kalpui a ni.

ZPM sawrkarna hnuaia Revenue Department hmalakna langsar tak pakhat dang leh chu ‘e-ram’ hi a ni. ‘E-ram’ hi February ni 19, 2025 khan hman tan niin, he 'online platform' hmang hian Revenue dawrtu ten Revenue Office tlawh kher ngai lovin ‘e-ram portal’ kaltlang hian dilna (heng-ram ruak dil, hming thlak, partition, redemarcation etc.) an thehlut thei tawh a, dilna pawh 2800 vel a lut tawh a, 600 bawr vel chinfel a ni tawh bawk.

Hei bakah hian tun hmain Revenue Department dawr nawm loh thu sawi rik a tam thin a. Chumi hre reng chuan department dawr nuam tak an nihna tur kawngah ‘Customer Care Policy’ duan a ni a, hei hian an hnathawhna kawngah a pui hle dawn a, hmun hrang hranga Revenue Office-ah te Customer Care Policy hi a takin hman chhoh a ni dawn a, tunah pawh hian Revenue Department hi sawrkar Office dawr nuam ber pawlah a chang chho mek tawh a ni.