MZU-a zirlai ten MIFCO hmuna hnathawh an en ho

Serchhip District chhung Chhingchhip khuaa MIFCO hmunpui chu kar kalta Ningani khan Mizoram University (MZU)-a Commerce Department zirlaite chuan tlawhin an hmalakna te a hmunah an en.
MZU-a zirlaite hi MIFCO Chairman Lalthazuala Rawite leh a thawhpui ten lo dawngsawngin helai hmuna Thei chi hrang hrang a tui sawrna khawl leh Mautuai leh Rawtuai Tin siamna khawl te chu enin thawktu ten an hnathawh dan an lo hrilhfiah a. Hemi hnu hian MIFCO-a thawktute leh zirlaite hi inkawm nghalin an thil hmuh leh zirchianna te thlirletna leh sumdawnna (Commerce) lama an hmathlir te bakah MIFCO hnathawh leh kalphung chungchanga an hriat duh te zawtin an sawiho bawk a ni.

MZU Commerce Department Field Trip-ah hian Commerce Subject zirlai 32 te kalin Lalhriatpuia Class Representative (CR) chuan a kaihruai a ni. Chhingchhip-a MIFCO hmunah hian Ropuiliani Women Farmer Producer Company Ltd. te chuan thlai thar sawngbawlna tur khawl bunin tunah hian hma an la chho mek a, an khawl te pawh hawng tura inbuatsaih mekin helai hmunah hian Petrol Pump thar siam tur ruahmanna chak tak a kalpui chhoh mek a ni bawk.