MZP kum 90 tlin lawmna leh Zirlaite ni Mizoram hmun hrang hrangah hman a ni

Mizo Zirlai Pawl (MZP) kum 90 tlin lawmna leh Zirlaite ni chu nimin khan hmun hrang hrangah hman niin Aizawl-a he ni puala hun hman ah MZP President Dr. C. Lalremruata chuan MZP chu hrechiang lova nuihsawh leh beitu an tam tih sawiin, heng mite hi sawrkar hna a dik lo taka lut te, hnamdang sumdawng mawngzawmpuia hlawkna tel ve te leh an chhungte an ni duh tlangpui tih a sawi.

Zirlaite ni leh MZP kum 90-na lawmna puala Inkhawm Aizawl-a I&PR Auditorium-a neih ah hian MZP General Hqrs. President Dr. C. Lalremruata chuan MZP chu hrechiang lova Social Media-a nuihsawh leh beitu an tam tih sawiin, vawikhatmah MZP Constitution la chhiar lo ten ‘MZP in an kuang lo an nawr’ titu chu sawrkar hna a dik lo taka lut MZP in bang tura an nawrte, hnamdang sumdawng mawngzawmpuia hlawkna tel ve te leh an chhungte an ni duh tlangpui tih a sawi a. MZP hrechiang lova nasa taka beitute chu pawn lam atanga MZP en lova a chhung ngeia en turin a sawm a, MZP chu zirlai pawl a nih angin zirna an ngaipawimawh tur a nih rualin nationalism an buaipui lo a nih chuan MZP chu engtikah mah a sang ngai dawn lo tih a sawi a, zirna leh nationalism chu Mizo Zirlai Pawl innghahna, a lungphum a ni a, rualkhai taka a kal zel theih nan theihtawpa hmalak a tul hle a ni, a ti a, MZP kum 90 tlin theih chhan chu hruaitu hmasa te thawhrah liau liau a nih thu pawh a sawi bawk a ni.

Mizo Zirlai Pawl (MZ) hi a tirah ‘Lushai Students Association’ (LSA) tiin October ni 27, 1935 khan Shillong-ah din a ni a, Kum 1946, September ni 1 khan Mizo Zirlai Pawl (MZP) tia a hming thlak ni mah se, Lushai Students Association (LSA) din ni October ni 27 chu MZP dinchampha atan hman a ni ta zel a. MZP din champha lawmna pui ber Aizawl-a neih ah hian kum 1935 atanga MZP President lo ni tawh te hnenah chawimawina hlan an ni bawk.

Kumin hian MZP chuan auhla (slogan) atan 'I nunna hi a hlu a ni' tih an hmang a, Zuk leh hmuam avanga nun titawi lo tur te, rilru hahna neite tan tanpuitu pan hreh lo tur te, dawhthei tur te, ngawlveina khura lut lo tura duhthlanna hmang thiam tur te, midang nena inpawhtlang thiam tur leh midang chhaih nawmnah lova thian thaa siam thin turte a infuihna hun atana hman a ni.

Education Minister Dr. Vanlalthlana pawhin MZP din champhaphak vawi 90-na leh Zirlaite Ni pualin Mizoram chhung leh pawna zirlai zawng zawngte chu an zirna kawngah Pathian malsawmna an dawn zel theihnan duhsakna hlanin chibai a buk a, zirlaite chu rilru hriselna tha tak nei tura chahin, ruihhlo leh zuk leh hmuam laka insum turin a chah a, zirlaite chu ram leh hnam hmakhua an nih avangin rilru leh taksa hrisel tak nei turin a chah bawk a ni.