Candidate 5 awm dawn; MCC bawhchhia ah puh

Thla thar November 11-a Dampa Bial-a Assembly by-election neih tura chuh tura hming pelut te tana inhnuhdawh theih hun chu nimin tlai dar 3:00 khan a tawp ta a, inhnukdawk an awm loh avangin he inthlanna ah hian Candidate mi 5 an awm dawn ta a ni.

He inthlanna neih turah hian National Party atangin BJP chuan Lalhming-thanga an din tir dawn a, INC chuan MLA lo ni tawh John Rotluangliana an din tir dawn a, State party atangin MNF chuan MLA hlui Dr. R. Lalthangliana dintirin ZPM chuan Vanlalsailova an dintir anga, Unrecognised register party atangin MPC chuan K. Zahmingthanga an din tir dawn bawk a ni.

Hetihlai hian Dampa Bial by-election neih turah Chief Minister Lalduhoma leh Adviser to Chief Minister Dr. Lorrain Lalpekliana Chinzah ten inthlan Model Code of Conduct (MCC) an bawhchhia nia sawiin nimin khan MNF Legal Board chuan Joint CEO hnenah complain an thehlut a. Akashvani Aizawl zawhna chhangin MNF Legal Board Secretary David R. Lal-sawmtluanga chuan Dampa Bial by-election lo awm tur atana Election Model Code of Conduct in a phuar tawh hnuah Reiek-a campaign kick off-ah Chief Minister Lalduhoma chuan Aieng herna khawl pek leh cheng vbc. 700 man tuilakna te a tiam niin a sawi a, Chief Minister Adviser Dr. Lorrain Lalpekliana Chinzah chuan Dampa bial-ah Free Clinic a buatsaih thu leh a Facebook Wall-ah amah ngeiin a tarlang tih a sawi bawk a. Inthlanna fel leh thianghlim a awm theih nan nimin khan Mizoram Joint Chief Electoral Officer, Ethel Rothangpuii hnenah complain an thehlut a, a tul ang angin hma an lo la dawn niin a sawi.

Dampa Bial-a Assembly by-election neih tur atan hian sawrkar lam pawhin inbuat-saihna ngawrh takin a kalpui mek a ni.